«Ես չեմ հավատում, որ Ալիկ Սարգսյանը կարող էր այդ աստիճանի հիմարություն ասած լինել»,- «Առաջին լրատվական»-ի հետ զրույցում ասաց նախկին ոստիկանապետ Սուրեն Աբրահամյանը` անդրադառնալով նախկին ոստիկանապետ Ալիկ Սարգսյանի այն ասածին, որ եթե ինքը լիներ Յուվեցի Կարոյի փեսայի տեղը, նույնպես կկրակեր:
Հիշեցնենք, որ ՀՀԿ համագումարի օրը լրագրողները նախկին ոստիկանապետից հետաքրքրվել էին, թե ինքն ինչպես կվարվեր ԱԺ ԲՀԿ-ական պատգամավոր Կարո Կարապետյանի՝ Յուվեցի Կարոյի փեսայի տեղը, կկրակե՞ր: «Եթե ես իմանայի, որ ֆիզիկականս կների և առանց զենքի գործադրման էդ երկուսի հարցերի կլուծեի, հաստատ զենք չէի գործադրի, բայց եթե տեսնեի, որ ֆիզիկականս չի ներում, ինչի մասին է խոսքը, կգործադրեի, իհարկե՝ իմ օրինական զենքը: Ես իմ օրինական զենքով ինձ կպաշտպանեի, բայց հո բոլորը չունեն դրա հնարավորությունը»,- ասել էր Ալիկ Սարգսյանը:
«Եթե ասել է՝ ուրեմն, չգիտեմ ինչ վիճակում է եղել: Ինչպես կարող է ներքին գործերի նախարարը, ոստիկանապետը իրեն այդ վիճակի մեջ դնի: Դա աբսուրդ է: Խոսակցությունները, թե հրահրել են այդ անձանց կամ ինչ՝ կենցաղային բնույթի են: Մենք վարսավիրանոցում չենք կամ կոլխոզի շուկայում, որ նման գնահատականներ տանք:
Հասարակական հնչեղության դեպքի մասին պաշտոնատար անձը հայտարարություն է անում: Անկախ նրանից, թե իր համակրանքը ում կողմն է, ինքը պետք է ռեալ փաստերի վրա հիմնվի: Ինչպես կարելի է նման ոչ կոմպետենտ գնահատական տալ: Հավատս չի գալիս, որ նման կարգի բարձր պաշտոն զբաղեցնող մարդը նման անհեթեթություն ասի: Ես ցավ եմ ապրում, որ նման տեսակետ է հնչել»,- հավելեց Սուրեն Աբրահամյանը:
Վերջինս չասաց, թե ինքը ինչ կաներ, պարզապես նկատեց, որ նման կարգի հասարակական հնչեղություն ունեցող դեպքերում ոստիկանությունը պետք է առավել զգուշավոր լինի, բայց վերջին 2-3 աղմկահարույց դեպքերով, նախկին ոստիկանապետի խոսքով, տրված հաղորդագրությունները, դրանցում նշված մականունները, որակումները արդեն այլ բանի մասին են խոսում:
«Պաշտոնական այն հաղորդագրությունները, որոնք տրվում են դեպքերից անմիջապես հետո, դրանցում առկա էին որոշակի պաուզաներ, որոշակի ձգձգվածություն, որը նման իրավական նիհիլիզմի պարագայում բերում է թյուրըմբռնման և տարբեր տեսակի էմոցիոնալ, երբեմն սխալ գնահատականների,- ասաց Աբրահամյանը՝ հավելելով,- երբ տուժողին ներկայացնում են «Կուլակի» կամ չգիտեմ ում փեսա, կամ մեկը, ով ապագայում պետք է գող կարգվի, սա անլուրջ է: Դրանով արդեն իսկ հող են նախապատրաստում, որ, գիտեք ինչ, ճիշտ է՝ այս մեկը սա է, բայց դիմացինն էլ մի բարի պտուղը չէ: Այսինքն՝ ամեն ինչ վեր են ածում կենցաղային մակարդակի: Իրավապահ մարմինները պետք է զերծ մնան այդ կարգի գնահատականներից: Իրենք չոր փաստերը հետաքննելու, նախաքննելու իրավասությունների շրջանակում պետք է սահմանափակվեն»: