Ինչպես հայտնի է՝ արդարադատության նախարարության ԴԱՀԿ ծառայությունը աճուրդ է հայտարարել Մարզահամերգային համալիրի հետ կապված, որի առթիվ որոշումը բողոքարկվում է դատարանում: Արդարադատության նորանշանակ նախարար Հովհաննես Մանուկյանի հետ «Առաջին լրատվական»-ը զրուցեց համալիրի աճուրդի և արդարադատության համակարգում առկա կոռուպցիայի մասին:
– Պարոն Մանուկյան, Մարզահամերգային համալիրի ղեկավարությունը հայտարարում է, որ արդարադատության նախարարության ԴԱՀԿ ծառայության հայտարարած աճուրդն ապօրինի է և որևէ հիմքեր չունի: Ի՞նչ կարող եք ասել այդ կապակցությամբ:
– Ես կարող եմ ասել, որ կա գործող օրենսդրություն, համաձայն որի նախատեսված են բողոքարկման ընթացակարգեր` կամ վերադասության կարգով, կամ դատական: եթե գտնում են, որ օրենքի հետ կապված որոշակի խնդիրներ կան, պիտի բողոքարկեն և փորձեն իրենց իրավունքները ռեալիզացնել:
– Համալիրի ղեկավարությունն արդեն բողոքարկել է: Դուք` որպես նախարար, փորձե՞լ եք պարզել՝ որքանով է իրավաչափ աճուրդը:
– Ես ուղղակի հայտարարությունների հիման վրա գործողություններ չեմ անում: Ես անում եմ այն գործողությունները, որոնք օրենքով են սահմանված: Այսինքն՝ պիտի բողոքարկման համապատասխան ընթացակարգ լինի, որ նախարարը իր իրավասությունից ելնելով կարողանա որոշակի ուսումնասիրություն կամ գործողություն կատարի: …Եթե բողոքարկել են, պիտի սպասեն արդյունքներին:
– Պարոն Մանուկյան, իսկ Դուք ի՞նչ եք պատրաստվում փոխել մեր արդարադատության համակարգում որպես նորանշանակ նախարար:
– Ես ուղղակի պիտի փորձեմ բերել այն վիճակի, որ հասարակական վստահությունը համակարգի նկատմամբ բարձրանա, որովհետև որևէ պետական մարմնի ցանկացած որոշում, ցանկացած գործողություն, եթե կա լեգիտիմության պակաս, վստահությունը հասարակության բարձր մակարդակի չէ, ապա այդ որոշումները ևս ունեն լեգիտիմության դեֆիցիտ: Դրա համար պիտի հասարակության վստահությունը բարձրացնենք:
– Ձեր նախորդներին փաստորեն այդքան էլ չի հաջողվել հասարակության վստահությունը բարձրացնել մեր արդարադատության նկատմամբ թե կոռուպցիայի, թե արդարադատությունում այլ դրսևորումների հետ կապված: Դուք ի՞նչ եք անելու, որ հասարակության վստահությունը բարձրանա:
– Անելու եմ ամեն ինչ՝ սկսած համակարգը կարգավորող օրենքներից, որտեղ կան բավական լուրջ պրոբլեմներ, և մենք պիտի աշխատենք էդ ուղղությամբ, վերջացրած ամենօրյա աշխատանքով: Այսինքն՝ ապօրինի դրսևորումներ, քաղաքացիների հետ կոպիտ վարվելակերպ կամ աշխատանքի նկատմամբ քամահրական վերաբերմունք անթույլատրելի եմ համարում, և ամեն ինչ անելու ենք, որ դա վերացնենք համակարգում:
– Իսկ համակարգում առկա կոռուպցիայի, դատավորների կողմից կաշառքներ վերցնելու կամ վերևից զանգելու խնդիրը ո՞նց եք պատրաստվում լուծել:
– Խնդիրն ունի լուծումների մի շարք եղանակներ: Այդ եղանակները պետք է համադրելի լինեն և միաժամանակ բոլոր ուղղություններով պետք է աշխատել. և օրենքների կատարելագործում, և էթիկական վերահսկողության ուժեղացում` թե դատական համակարգում, թե արդարադատության նախարարության համակարգում: Ամենօրյա ուշադրության կենտրոնում պետք է լինեն ահազանգերը, որ ստացվում են քաղաքացիներից: Դա միջոցառումների կոմպլեքս է, հնարավոր չէ ասել՝ այս ձևով կամ այն ձևով, կախարդական փայտիկ չկա, որ այդ խնդիրները լուծվեն վայրկենապես:
– Կառավարության ծրագիրը Ձեզ ինչ-որ բան փոխելու հնարավորություն տալի՞ս է:
– Կառավարության ծրագրում կան ուղենիշներ բավականին հետաքրքիր, որոնք իրավիճակը կարող են բարելավել, բայց մենք միայն կառավարության ծրագրով չենք սահմանափակված, որովհետև կառավարության ծրագիրը միայն գլոբալ ճանապարհներն է ցույց տալիս և տեսլականը առաջիկա տարիների: Կան խնդիրներ, որոնք ավելի պրակտիկ են, կառավարության ծրագրում, բայց մենք կիրականացնենք ամենօրյա գործունեության մեջ: