Բանակում խաղաղ պայմաններում զոհված զինվորների մայրերին, ովքեր ամեն հինգշաբթի գալիս են կառավարության մոտ, այսօր վրդովեցրեց անցնող քաղաքացիներից մեկի ամոթանքը: Նրանք հակադարձ պատասխանը տվեցին:
2010 թվականի դեկտեմբերի 17-ին Հադրութի զորամասերից մեկում մահացած զինծառայող Արթուր Ղազարյանի մայրը՝ Իրինա Ղազարյանը, «Առաջին լրատվական»-ի հետ զրույցում ասաց, որ տարին մեկ տղա է ուղարկել Ղարաբաղ՝ ծառայության, և ուրախ է եղել, բայց իր իսկ խոսքով՝ չգիտեր, որ մի ստոր նարկոմանի և խմողի կարող է հանդիպել.
«Ջհանգիրյան Մարտինը նույնն է եղել, որովհետև բոլոր հրամանատարները կոնտուզիա են ստանում, նարկոշ են, հանեք նրանց, ինչո՞ւ չեք հանել, որ մեր երեխեքի կյանքը խլեն՝ ինչո՞ւ: Իմ երեխու ներսում օրգան չի եղել: Քանի Շոթա Վարդանյանը կար, զինվորները ոչ մի օրգան չունեին: Շոթային թող էն ժամանակ հանեին, ինչո՞ւ են հիմա հանում: Շոթան մեզ բարեկամ է, բայց չեղնի տենց բարեկամը: Քանի սաղ եմ, ինքը օր ու արև չի ունենալու, այնքան, որ ասելու է՝ ախր, ես այդ ինչ արեցի: Ինքը ոչ մի լավ օր չի ունենալու»,-ասաց Իրինա Ղազարյանը, ով վստահ է, որ որդու օրգանները վաճառել են:
Այսօր բանակում խաղաղ զինվորների մայրերը կառավարության մոտ հանդիպեցին արդարադատության նորանշանակ նախարար Հովհաննես Մանուկյանին:
«Մեր պահանջն է արդար դատավարությունը, մեղավորները պատժվեն, մեզ շոու պետք չէ»,-ասաց Տիգրան Օհանջանյանի մայրը՝ Գոհար Սարգսյանը:
Արդարադատության նախարարն ասաց, որ արդարադատության նախարարը դատարանների գործառույթ չի իրականացնում, արդարադատության նախարարը ոչ դատախազ է, ոչ դատարան: «Ես չեմ կարող այնպիսի բաներ անել, որի իրավունքն օրենքով չունեմ»,- ասաց նա:
Զինվորների մայրերը հետաքրքրվեցին՝ իսկ ի՞նչ է իրավասու անել արդարադատության նախարարը: «Եթե ես կարող եմ իմ ֆունկցիաների, իմ լիազորությունների շրջանակում անել, կանեմ, բայց ես չեմ կարող իմ լիազորություններից դուրս գալ»,- ասաց նախարարը:
«Ես ուզում եմ իմ հանրապետության մեջ մեղավորը պատժվի, մեզ շոու պետք չէ»,- ասաց Գոհար Սարգսյանը: Նախարարը հավաստիացրեց, որ ինքն էլ է դա ուզում:
Հովհաննես Մանուկյանը մայիսի 31-ին, ժամը 10:30-ին, հանդիպում նշանակեց խաղաղ պայմաններում մահացած զինվորների մայրերի հետ: