Մամուլում լուրեր են շրջանառվում, որ հուլիսին Երևանում կանցկացվի հայ մասոնների հավաք, որին ներկա է լինելու ՀԱԿ առաջնորդ Լևոն Տեր-Պետրոսյանը:
Մասոնական օթյակի անդամ, Կինեմատոգրաֆիստների միության նախագահ Ռուբեն Գևորգյանցից «Առաջին լրատվական»-ը հետաքրքրվեց՝ երբևէ Լևոն Տեր-Պետրոսյանը մասնակցե՞լ է մասոնների հավաքին:
«Եթե դուք ասում եք, որ ինքը երբեք չի մասնակցել, ուրեմն դուք ասում եք, որ նա մասոն է: Լևոն Տեր-Պետրոսյանը մասոնության հետ որևէ կապ չունի, վե՛րջ»,- ասաց նա:
Իսկ թե ինչու են մասոնները հավաքը գաղտնի պահում, Ռուբեն Գևորգյանցը նշեց՝ որովհետև այդպես է:
Հիշեցնենք, որ մասոնները ամենամյա հավաքներ են անցկացնում Հայաստանում՝ «Արմենիա Մարիոթում»: Այս տարի, ըստ շրջանառվող լուրերի, Grand Orient De France օթյակի Մեծ Վարպետ պարոն Գի Արսիզենը դարձյալ կգա Հայաստան ։
Նշենք նաև, որ դեռ 2011-ին նա Հայաստան կատարած այցի ժամանակ լրագրողների հետ հանդիպմանը նշել էր, որ քաղաքական թեմաները ու գործիչները չեն հետաքրքրում մասոններին։ «Մենք ասում ենք՝ մարդ պետք է արժանապատիվ մահանա: Գիտե՞ք, որ ԱՄՆ գրեթե բոլոր նախագահները եղել են ֆրանկ-մասոններ։ Ամերիկյան Սահմանադրությունը գրվել է մասոնների կողմից։ Այն ժամանակ մասոնները միասին են եղել։ Սակայն անգլոսաքսոն մասոնները կորցնում են իրենց կարևորությունը, որովհետև վաճառում են իրենց օթյակները»,- ասել էր նա։