Спорт-Экспресс- ի հաղորդմամբ, «Կուբան»-ի նախկին ֆուտբոլիստ Նիկոլա Նիկեժիչի ներկայացուցիչ Նիկոլա Յոկշիչն ասել է, որ ռուսական ակումբը 100 հազար դոլար է առաջարկել ֆուտբոլիստի հետ կոնֆլիկտը հարթելու նպատակով: Հիշեցնենք, որ Նիկեժիչը ՖԻՖԱ-ի և ՈւԵՖԱ-ի ղեկավարությանն ուղարկած նամակում մանրամասն պատմել էր, թե ինչպես են իրեն ծեծել ու սպառնացել, որ խզի ակումբի հետ ունեցած պայմանագիրը: Այժմ արդեն Յոկշիչի խոսքերով «Կուբան»-ի ներկայացուցիչները գումար են առաջարկում կոնֆլիկտի հետագա զարգացումներից խուսափելու համար:
«Ինձ Ռուսաստանից զանգահարեց մի գործակալ և գումար առաջարկեց, որքան ես հասկացա՝ «Կուբան»-ի մարզական տնօրեն Սերգեյ Դորոնչենկոյի խնդրանքով: 100 հազար դոլար բերում են Բելգրադ, որից 10 հազարը նախատեսված է ինձ համար, և մենք մոռանում ենք այդ պատմությունը: Ես զանգահարեցի Նիկեժիչին, և նա որոշեց հրաժարվել: Այժմ` մարտ ամսին, գրեթե անհնար է նոր աշխատանք գտնել: Իսկ ինչո՞ւ նա պետք է գումար կորցնի»,- հայտարարել է Յոկշիչը: Նրա խոսքերով «Կուբան»-ում մնալու պարագայում ֆուտբոլիստը պետք է աշխատեր 256 հազար դոլար:
Ավելի վաղ Սերգեյ Դորոնչենկոն Р-Спорт-ի հետ զրույցում ասել էր, որ չեռնոգորիացի ֆուտբոլիստը որոշակի գումարի դիմաց պատրաստ է հետ կանգնել իր բոլոր պահանջներից:
«Նիկեժիչի գործակալներն ինձ ասացին, որ նա պատրաստ է երեք աշխատավարձի դիմաց հետ կանգնել իր բոլոր պահանջներից: Ես ոչ մի աշխատավարձ էլ չեմ վճարելու», – հայտարարել էր մարզական տնօրենը:
