Երեկ Մոսկվայում ՌԴ արտգործնախարար Սերգեյ Լավրովն ու Թուրքիայի արտգործնախարար Ահմեդ Դավութօղլուն քննարկել են ԼՂ հակամարտության կարգավորման հարցը: Դավութօղլուն, որը Մոսկվա է ժամանել Բաքվից, հայտարարել էր, որ համատեղ ջանքեր են գործադրելու ԼՂ հակամարտության հարցը լուծելու, ապա հայ-թուրքական և հայ-ադրբեջանական հարաբերությունները կարգավորելու համար: Մի շարք փորձագետների կարծիքով՝ Դավութօղլուի խոսքը հակամարտության համատեղ կարգավորման մասին բավականին անորոշ դիտարկում է, քանի որ Թուրքիան միջնորդ երկիր չէ ու անհասկանալի է նաև այն, թե ինչու է դիմում Ռուսաստանի օգնությանը:
«Առաջին լրատվական»-ի հետ զրույցում Jane’s Intelligence պաշտպանության և անվտանգության հարցերով հեղինակավոր վերլուծական կենտրոնի ԱՊՀ-ի և Ռուսաստանի հարցերով առաջատար վերլուծաբան Լիլիթ Գևորգյանն ասաց, որ ԼՂ հակամարտության կարգավորման համար բարենպաստ հիմքեր այսօր չկան: Նրա համոզմամբ, ռուս-թուրքական մերձեցման հերթական փուլը պայմանավորված է աշխարհաքաղաքական գործընթացներով:
«Թուրքիան վաղուց է ցանկանում մաս դառնալ խաղաղարար գործընթացին Ղարաբաղում, սակայն հաջողության չի հասնում, և չեմ կարծում, թե առանձնապես մեծ հաջողություն կունենա առաջիկայում: Այս պահին Ռուսաստանը հայտնվել է միջազգային մեկուսացման մեջ Արևմուտքի կողմից, ուստի Թուրքիայի հետ լավ հարաբերություններ պահպանելը կարևոր է ռուսական արտաքին քաղաքականության համար: Չեմ կարծում, թե մենք արագորեն ականատեսը կդառնանք Թուրքիայի ներգրավմանը ԼՂ հակամարտության նոր խաղաղարարական աշխատանքներին կամ որևէ նոր հարթակին»,- նշեց Լիլիթ Գևորգյանը՝ հավելելով, որ սրանք ավելի շատ հայտարարություններ են, քան լուրջ քաղաքականության փոփոխություն:
Անդրադառնալով Մինսկի խմբի տապալման մասին խոսակցություններին՝ միջազգայնագետը նշեց, որ ԵԱՀԿ Մինսկի խմբի տապալման մասին խոսակցություններն անհիմն են: Ըստ Լիլիթ Գևորգյանի՝ ԵԱՀԿ Մինսկի խումբը ամենաընդունելի ձևաչափն է հակամարտության կողմերի համար: Իրեն չի թվում, որ շատ արագ ԵԱՀԿ Մինսկի խմբի ձևաչափը մի կողմ կնետվի, քանի որ այն ստատուս քվոյի պահպանությանն ուղղված ձևաչափ է: