Ամերիկյան ազդեցիկ The New York Times թերթը Բաքվի մասին հոդված է հրապարակել` անդրադառնալով բնակչության աղետալի վիճակին ու այդ համատեքստում իշխանությունների հղփացած կյանքին: «Երեկոյան ժամերին ականատես եղանք երիտասարդ աղջիկների հետ թանկարժեք մեքենաներով Փաշաեւների ընտանիքին պատկանող «Չինար» ռեստորան զվարճանալու եկող տղամարդկանց»,- հոդվածում ասում է հեղինակ Քեթլին Քինգսբերին:
«Ազադլիգ» պարբերականի փոխանցմամբ, անդրադառնալով Ադրբեջանի առաջին տիկին Մեհրիբան Ալիեւայի հայրական տան` Փաշաեւների ընտանիքի ունեցվածքին, Հեյդար Ալիեւի անվամբ կառուցվող կենտրոնին եւ ընդհանրապես քաղաքում իրականացվող շինարարությանը` Ք.Քինգսբերին հոդվածում միաժամանակ խոսել է Ադրբեջանում խոսքի ազատության եւ մարդու իրավունքների անմխիթար վիճակի մասին: «Իլհամ Ալիեւի գլխավորած իշխանությունը միջազգային կազմակերպությունների կողմից հաճախ քննադատության է ենթարկվում մարդու իրավունքների բնագավառում առկա աղետալի վիճակի համար: Երկրում փաստացի բացակայում է մամուլի ազատությունը: Պահպանողական սոցիալական նորմերը հնարավորություն չեն տալիս կանանց լայն դերակատարություն ունենալու հասարակական-քաղաքական կյանքում: Բաքվում ունեւորների եւ աղքատ խավի միջև անջրպետը տարեցտարի էլ ավելի է խորանում»,- նշել է հոդվածագիրը:
Թերթն ընդգծել է նաեւ Ադրբեջանում բնակչության ծանր սոցիալական վիճակն ու վերջիններիս լուրջ դժգոհությունը` գրելով. «Բաքվում կոռուպցիան զգացվում է ամեն քայլափոխի. Բաքու ժամանող հյուրերը բողոքում են, որ իրենց մեքենաները ոստիկանության կողմից հաճախակի են կանգնեցվում»: «Ադրբեջանցիները հասկանում են, որ արժանի են լավ ապրելու եւ հենց դրա համար էլ նրանք իրավացիորեն պայքարում են»,- հավելել է New York Times-ի լրագրողը: