«Որպես քաղաքացի, որպես ընտրող, որպես ավագանու անդամ` շատ բացասական եմ գնահատում Արմավիր քաղաքի քաղաքապետի գործունեությունը»,- մեզ հետ զրույցում նշեց Արմավիր քաղաքի ավագանու անդամ, քաղաքապետի անկուսակցական թեկնածու Սևակ Մինասյանը:
– Հաշվի առնելով Արմավիր քաղաքում նախորդ ընտրությունների դառը փորձը` ինչպե՞ս եք գնահատում այս ընտրությունների ընթացքը:
– Այս տարի, իմ պատկերացմամբ, նորմալ մրցակցություն է ընթանալու, և ավելի մաքուր ընտրություններ են լինելու, քան նախկինում: Համենայնդեպս, փորձելու ենք մեր ձայները պահել:
– Սերժ Սարգսյանը անձամբ է հայտարարել, որ ընտրությունները անցնեն առանց ավելորդությունների: Ըստ Ձեզ` այս հրահանգը բավարա՞ր է, որ ընտրությունները նորմալ անցնեն, թե՞ ոչ: Մտավախություն չունե՞ք, որ ընտրությունների ելքը այս անգամ ևս քրեականները կկանխորոշեն:
– Իմ կարծիքով, եթե ժամանակին ահազանգենք ընտրակեղծիքների մասին, ինձ թվում է` նախագահի ելույթը և կոչը բավարար են, որ արդար ընտրությունների գնանք:
– Բայց տարիների փորձը ցույց է տալիս, որ այդ ահազանգերը նպատակին չեն ծառայում: Ավելին` թեկնածուները հերթական ընտրություններից առաջ վստահ են լինում, որ այս անգամ ընտրակեղծիքները կզսպվեն, բայց ընտրություններից հետո սկսում են բարձրաձայնել ընտրակեղծիքների մասին: Այսօր, օրինակ, Դուք ինչպե՞ս եք պայքարում կամ մտադիր պայքարել ընտրակեղծիքների դեմ:
– Ընտրակեղծիքների տարբեր ճանապարհներ կան, որոնց միջոցով նախկինում ընտրակեղծիքներ են իրականացրել: Սակայն այս տարի փորձելու ենք ամեն կերպ ընտրությունները պահել: Ինչ վերաբերում է ընտրակեղծիքի տարբերակներին` դա հիմնականում կրկնակի քվեարկությունն է, այն մարդիկ, ովքեր գրանցված չեն եղել Արմավիրում: Հիմա Արմավիրում ընտանիքներ կան, որոնց ընտանիքի վրա նոր մարդիկ են գրանցվել, որոնց չեն էլ ճանաչում, չեն էլ տեսել: Ներկա դրությամբ էլ նման խնդիր կա: Մենք ցուցակագրված դիմում ենք ներկայացրել քաղաքապետարան, ոստիկանություն և պատկան այլ մարմիններ` ստեղծված իրավիճակին մինչև ընտրություններ լուծում տալու համար: Նախորդ ընտրություններում բերել մարդկանց են գրանցել, այսօր էլ նրանք այնտեղ չեն ապրում, բայց նրանց անձնագրի մեջ ելքի կնիք չկա խփած: Մահացածների ցուցակներն էլ են ակտուալ, որոնք միշտ հայտնվում են ընտրողների ցուցակի մեջ:
– Մեզ հայտնի են Արմավիրի քաղաքապետի կողմից բազմաթիվ ապօրինություններ, չարաշահումներ: Բայց մյուս կողմից` նա իշխող կուսակցության անդամ է, իսկ Դուք` անկուսակցական: Ձեզ համար դժվար չէ՞ անկուսակցական լինելով պայքարել պետական մեքենայի դեմ: Ինչո՞ւ ընտրություններից առաջ չանդամագրվեցիք, օրինակ, ՀՀԿ-ին, ԲՀԿ-ին կամ ՕԵԿ-ին, որ ընտրապայքարում առավելություն ունենաք: Թե՞ դուք սկզբունքային անկուսակցական եք:
– Մենք` յուրաքանչյուրս, այս պետության մի մասնիկն ենք: Ինձ թվում է, որ մենք թշնամի չենք այս պետությանը և վաղվա լավ օրվան: Այդ կուսակցություններն էլ մեզանով են չէ՞ ձևավորվել, ստեղծվել: Ինչ տարբերություն կուսակցական ես, թե ոչ: Ինչ վերաբերում է կուսակցական լինել կամ չլինելուն` ես երբեք որևէ կուսակցության անդամ կամ համակիր չեմ եղել:
– Որպես Արմավիրի բնակիչ, ինչպե՞ս եք գնահատում գործող քաղաքապետի գործունեությունը այս տարիների ընթացքում:
– Շատ բացասական: Որպես քաղաքացի, որպես ընտրող, որպես ավագանու անդամ` շատ բացասական եմ գնահատում նրա գործունեությունը: Մենք ունենք այգու խնդիր, որը որպես այգի այսօր չի ծառայում: Մեր ամբողջ տարածաշրջանում ծառերի, կանաչի բացակայության խնդիր կա: Ցինկը իրենց օրգանիզմի համար թույն է ներկայացնում, այնինչ մեր շենքերի շքամուտքերով ցինկե խողովակներով ջրագծեր են անցկացված: Այսինքն` գործող քաղաքապետը թունավորում է իր բնակչին, իր ընտրողին, իր քաղաքացուն: Այդ աշխատանքները իրականացվել է «Լեգենդար» ՍՊ-ի կողմից, որի հիմնադիրներից մեկը ինքն է: Ավելին` բոլոր մրցույթներում շահում է «Լեգենդար» ՍՊ-ն: Բազմաթիվ չարաշահումներ կան թեկուզ հողերի տարածքների աճուրդների հետ կապված: Ընդունենք` մենք գիտենք, թե շուկայական արժեքներով ինչ և ինչքանով է վաճառվում: Այդ հողատարածքը ինչ-որ մեկը գնում իրենից, որի գինը կադաստրային արժեքով կամ ավագանու որոշմամբ մինչև 50 տոկոս իրավունք ունեն զիջել: Այդ արժեքով գնում են, հետո 150-200 դոլարով քառակուսի մետրը վաճառում են: Դրա համար մեր բյուջեն չի ձևավորվում: Իսկ եթե դա մրցութային կարգով լինի, նորմալ բյուջե կունենանք:
-Արմավիրում ընդդիմադիր, դժգոհ մասսան մեծամասնություն է կազմում, ինչպիսին են Ձեր հարաբերությունները ՀԱԿ-ի, ՀՅԴ-ի, «Ժառանգության» հետ: Դուք ապավինո՞ւմ եք ընդդիմադիր ընտրազանգվածի աջակցությանը:
-Ես չեմ ցանկանում իմ ընտրազանգվածին քաղաքականացնել, ավելի շատ իմ հույսը դրել եմ մեր ժողովրդի, իմ քաղաքի ընտրողի վրա:
-Թեև Դուք դեմ եք քաղաքականացմանը, բայց սոցիալական խնդիրները մարզերում գնալով շատանում են, ինչը քաղաքականության արդյունքն է, եթե ընտրվեք, ինչպե՞ս եք պայքարելու սոցիալական խնդիրների դեմ:
-Ժողովուրդը բոլորն էլ աշխատում, իրենց ընտանիքները պահում են: Ամեն ընտանիք ապրուստը վաստակելու մի ձև ունի: Այս մարդիկ առաջին հերթին ցանկանում են, որ քաղաքի վիճակը բարելավվի, քաղաքի համար մի բան արվի: Մեր քաղաքը ճանապարհների, լուսավորության, ջրի, սպորտի, մշակույթի տան խնդիրներ ունի, որոնք լուծելու համար ամենօրյա աշխատանք է պահանջվում:
-Ձեզ լսելուց՝ տպավորություն է ստեղծվում, որ Արմավիրում գործազրկության խնդիր չկա:
-Բոլոր տեղերում էլ աշխատատեղերի խնդիր կա, բայց աշխատատեղ ստեղծելը քաղաքապետի պարտականությունը չէ: Հետևաբար դժվար է այս հարցին միանշանակ պատասխան տալ:
-Բոլորն էլ ընտրություններից առաջ ասում են, թե ես կգամ, այսպես կանեմ, այնպես կանեմ, բայց ընտրվում են ու այդ ամենի մասին մոռանում կամ հասկանում, որ իրենց ցանկությունը քիչ է:
-Եթե մի անգամ մարդիկ կարողանան ճիշտը ներկայացնել հենց իշխող կուսակցության ղեկավարությանը, ինձ թվում է, որ նման խնդիր չի առաջանա, և այդ հարցերը կլուծվեն: Ամեն դեպքում այսօր իշխող կուսակցության ղեկավարը փորձում է այդ հարցերը կարգավորել, որ ժողովուրդը չգնա հեղափոխության: Իսկ եթե այսօրվա պաշտոնյան կարողանա ճիշտ ներկայացնել իրավիճակը տեղերում, ասի՝ սա եմ արել, նա եմ արել, իմ մոտ ամեն ինչ լավ է, արդեն այդ խնդիրները չեն լինի: Պարզապես որոշ պաշտոնյաներ չեն կարող այդ ամենը ներկայացնել, որովհետև այդ բացերը իրենց տակն են:
– Որոշ աղբուրներ պնդում են, որ Ձեզ ԲՀԿ-ն է հովանավորում:
– Ես որևէ կուսակցության հետ որևէ խնդիր չունեմ: Երկու կուսակցություններում էլ` և՛ «Հանրապետական», և՛ ԲՀԿ, և՛ մնացած բոլոր կուսակցություններում էլ կան մարդիկ, որոնց հետ շփվում ենք: Մենք նման խնդիր չունենք, մենք հո Սարոյան եղբայրները չենք: Խռովագին կրակով մեկը մյուսի հետ շփվենք: Նախընտրում եմ՝ հավաքվելով կլոր սեղանի շուրջ` եզրեր փնտրենք և գտնենք, ոչ թե իրար փնովենք, իրար վատաբանենք:
– Իսկ ձեր նախընտրական պայքարը ո՞ւմ կողմից է հովանավորվում:
– Իմ նախընտրական պայքարը որևէ մեկի կողմից չի հովանավորվում, կազմակերպել ենք մենք` մեր ընկերներով և քաղաքի բնակիչներով: