Ինչպես տեղեկացնում է Ոստիկանության կայքը, հոկտեմբերի 28-ից 30-ը Թեհրանում էր գտնվում ոստիկանապետ Ալիկ Սարգսյանի գլխավորած պատվիրակությունը` Իրանի Իսլամական Հանրապետության կարգապահական ուժերի (ոստիկանության) գլխավոր հրամանատար, բրիգադի գեներալ էսմայիլ Ահմադի Մողադամիի հրավերով: Ըստ այդմ, Ալիկ Սարգսյանի եւ էսմայիլ Ահմադի Մողադամիի հանդիպման ընթացքում քննարկվել են «երկու երկրների ոստիկանական ծառայությունների համագործակցության խնդիրները` պայքար թմրամիջոցների ապօրինի շրջանառության, անօրինական մուտքի դեմ, երկու երկրների քաղաքացիների համար մուտքի եւ ելքի գործընթացի դյուրացում, ծառայողների վերապատրաստում եւ այլն»: Կարեւորվել է ՀՀ ոստիկանության եւ ԻԻՀ կարգապահական ուժերի համագործակցության մասին համաձայնագրի կնքման անհրաժեշտությունը: Ավելին՝ հանդիպման արդյունքներով ստորագրվել է Իրանի Իսլամական Հանրապետության եւ Հայաստանի Հանրապետության միջև ոստիկանության բնագավառում համագործակցության արձանագրություն: Հիշեցնենք, որ Իրանի ոստիկանապետը հատկապես աչքի է ընկել ԻԻՀ-ում տեղի ունեցած վերջին նախագահական ընտրություններից հետո ընդդիմությանը ջարդելով: Մասնավորապես, հանուն Իրանում մարդու իրավունքների ստեղծված միջազգային շարժումը Իրանում կայացած նախագահական ընտրություններից հետո հրապարակել էր այդ երկրի այն հինգ պաշտոնյաների անունները, ովքեր հատկապես աչքի են ընկել այդպիսի դաժան գործողություններով: Նրանց թվում երրորդ հորիզոնականում է հենց Մողադամը: Ըստ զեկույցի` իրանական ոստիկանության ղեկավարի ենթակայության տակ գտնվող ուժերը աչքի են ընկել ընդդիմադիր ցուցարարների նկատմամբ դաժան հարձակումներով, հետընտրական զարգացումների ժամանակ սեփականության ոչնչացմամբ, ինչպես նաեւ գիշերային ժամերին Թեհրանի համալսարանի հանրակացարանի վրա հարձակումներով:
