«Էյներ Խաչատրյանը հերթական անգամ ապացուցեց, որ ինչպես Լիսկայի գերդաստանի արական սեռի մյուս անդամները, ինքը նույնպես հավատարիմ է մնում արյունարբուի լիսկայական բնազդին»,- «Առաջին լրատվական»-ի հետ զրույցում անդրադառնալով Գորիսում տեղի ունեցած հայտնի միջադեպին՝ ասաց Գորիսի նախկին քաղաքապետ Սամվել Հարությունյանը:
«Էյներ Խաչատրյանը 2004 թվականին իր մյուս հորեղբոր որդու՝ Մայիս Խաչատրյանի հետ առանձնակի դաժանությամբ, դանակի բազմաթիվ հարվածներով սպանեց Գորիս քաղաքի երիտասարդ բնակիչ, 3 երեխաների հայր Հովհաննես Բադալյանին և այդ ծանրագույն հանցանքի համար անգամ մեկ օր չազատազրկվեց»,- հավելեց Հարությունյանը:
Վերջինիս խոսքով՝ Սուրիկ Խաչատրյանի եղբորորդու մասնակցությամբ ծեծը լիովին տեղավորվում է Խաչատրյանների գործելաոճում: «Դա նրանց գործելաոճն է. մարդկանց առևանգում են, տանում անհայտ ուղղությամբ և, ինչպես նրանց բնավորությունն է, որոշակի ժամանակ պահելուց, հետքերը վերացնելուց, ահուսարսափի մեջ պահելուց հետո, գուցե նաև գնելով նրանց արյունը՝ ազատվում են քրեական պատասխանատվությունից: Գորիսում արյուն ծախելն արդեն բիզնես է դարձել»,- հավելեց Հարությունյանը:
Սամվել Հարությունյանը «Առաջին լրատվական»-ի հետ զրույցում անդրադարձավ նաև իր և Սուրիկ Խաչատրյանի միջև առկա դատական գործերին: Ըստ նրա՝ «Լիսկայի բազմաթիվ հանցանքների նկատմամբ հանցավոր անգործություն դրսևորած գլխավոր դատախազ Գևորգ Կոստանյանը, ՀՔԾ պետ Վահրամ Շահինյանը, դատավորներ Գայանե Կարախանյանը և Գրիշա Մելիք-Սարգսյանը պետք է անհապաղ հեռացվեն զբաղեցրած պաշտոններից և ենթարկվեն քրեական պատասխանատվության»:
«Անցած մեկ տարվա ընթացքում հրապարակածս բազմաթիվ ճչացող փաստ-ապացույցներով մերկացրել եմ Սյունիքի նախկին մարզպետ Սուրիկ Խաչատրյանի արտասովոր քրեական ընթացքը, համոզել, որ վերջինս հայոց հայրենիքից հափշտակել է ավելի քան 200 միլիոն դոլարին համարժեք 80 միլիարդ դրամի ֆինանսական և այլ միջոցներ: Բացի այդ, բազմաթիվ այլ հանցագործությունների մասին եմ բարձրաձայնել, սակայն ՀՔԾ-ն գտել է, որ դրանք բավարար չեն՝ քրեական գործ հարուցելու համար: Մինչդեռ ներկայացրածս փաստերը բավարար են նրա դեմ քրեական գործ հարուցելու և Սուրիկ Խաչատրյանին ձեռնաշղթաներ հագցնելու համար: Պարզապես այդ տվյալների մեջ պակասում է Սերժ Սարգսյանի համաձայնությունը, ինչն, անշուշտ, չեմ կարող ապահովել»,- ասաց Հարությունյանը: