«Առաջին լրատվական»-ի զրուցակիցն է ԱԺ ԲՀԿ խմբակցության պատգամավոր Արագած Ախոյանը:
– Պարոն Ախոյան, Ձեր գործընկեր պատգամավոր Կարո Կարապետյանի փեսան շաբաթ օրը ՙՎերնիսաժում՚ ինչ-որ վիճաբանության ընթացքում հինգ հոգու հրազենային վնասվածք է հասցրել: Ինչի՞ արդյունք են նման երևույթները:
– Դեռ չեմ ուսումնասիրել, բայց նման երևույթները չեմ ընդունում: Գնահատական էլ չեմ ուզում տալ, որովհետև դեռ տեղյակ չեմ, թե հաստատ Կարո Կարապետյանի փեսան է, թե` ոչ:
– Բայց նա արդեն ձերբակալված է:
– Դե ուրեմն կստանա իր արժանի պատիժը:
– Իսկ արդյոք դա պատգամավորի որդի կամ բարեկամը լինելու ամենաթողության արդյունքը չէ՞:
– Դա պատգամավոր լինել-չլինելու հետ ոչ մի կապ չունի: Դա կապ ունի մարդկային տեսակի հետ: Ինչի մեր երեխաներն ու փեսաները նման բան չեն անում: Իրենք են որոշել, դա իրենց ապրելակերպն է, ոչինչ չեմ կարող ասել:
– Պարզապես պաշտոնյաների զավակների կամ բարեկամների մասնակցությամբ հաճախ են նման դեպքեր պատահում:
– Մեր պետությունը շատ փոքր է, բոլորը մեկը մեկի հետ կապ ունեն, բոլորը բարեկամներ ու ընկերներ են: Այնպես որ, չեմ կարծում, թե այդտեղ շեշտված առավելություն ունենալու հանգամանք կա: Դա մարդկային տեսակի հարց է:
– Միգուցե պաշտոնյաների բարեկամների ու հարազատների մոտ անպատժելիության զգացողություն կա, որ կարող են նման արարքներ թույլ տալ ու օրենքի խստությամբ չպատժվել: Հատկապես, որ տվյալ դեպքում Կ. Կարապետյանն ունի ԲՀԿ ղեկավար Գագիկ Ծառուկյանի հովանավորությունը:
– Ոչ, ոչ: Որևէ մեկը պաշտպանված չէ, որ կարող է հանցագործություն կատարել ու չպատժվել: Ինչ կապ ունի պատգամավոր է, թե սովորական քաղաքացի:
– Վստա՞հ եք, որ Ձեր կուսակցի փեսան օրենքի ամբողջ խստությամբ կպատժվի:
– Դա իրավապահ մարմինների գործն է: Ես համոզված եմ, որ որևէ առավելություն կամ պատգամավորության հետ կապելու խնդիր չի լինելու:
– Հովիկ Աբրահամյանն անցած շաբաթ գործարարների հետ հանդիպման ժամանակ հայտարարեց, որ այսուհետ բոլորը պետք է գործեն հավասար պայմաններում: Հավատո՞ւմ եք, որ մեր երկրում նման իրավիճակ կստեղծվի:
– Բոլորս էլ աշխատել ենք հավասար դաշտում: Հարցրեք իրեն, պարոն Աբրահամյանին: Միգուցե… ես չգիտեմ, թե ինքն ինչ է նկատի ունեցել:
– Միգուցե ինքն է ոչ հավասար, այսինքն` արտոնյալ պայմաններում աշխատել:
– Իրեն հանգիստ թողնենք, որովհետև ես որքան հիշում եմ մեր վարչապետին, միշտ եղել է պետական պաշտոնյա, բիզնեսի ոլորտից պարոն Աբրահամյանին չեմ հիշում: Կարող է բիզնես ունենա, բայց մարզպետ եղած ժամանակից ես նրան հիշում եմ որպես պետական պաշտոնյա:
– Բայց նա ունի մեծ սեփականություն ու իր պաշտոնական լծակներն օգտագործելով՝ կարող է այնպիսի պայմաններ ստեղծել, որ իր բիզնեսը գործի արտոնյալ պայմաններում:
– Չգիտեմ, դա ձեր կարծիքն է, դուք ասում եք, դուք էլ պատասխանեք: Միգուցե խոշոր սեփականատեր է, բայց իր բիզնեսը հանձնում է կառավարման:
– Նույնը վերաբերում է նաև Ձեր կուսակցության ղեկավար Գագիկ Ծառուկյանին, ով նույնպես խոշոր սեփականատեր է, բայց կարծես թե իր բիզնեսն ինքն է ղեկավարում, քանի որ ԱԺ նիստերին չի մասնակցում:
– Ավելի քիչ է բիզնեսով զբաղվում: Խմբակցության ղեկավար է, նա ամբողջ օրը զբաղված է:
– Ամեն դեպքում, եթե Հ. Աբրահամյանը նման հայտարարություն է արել, նշանակում է, որ մինչև այժմ գործարարության համար հավասար պայմաններ չեն եղել:
– Չեմ կարող ասել: Ես մինչև հիմա խոչընդոտների չեմ հանդիպել, որ ինչ-որ մեկն առավելություններ ունենա իմ նկատմամբ:
– Դուք կարծում եք` Հ. Աբրահամյանի կամ Գ. Ծառուկյանի հետ հավասա՞ր պայմաններում եք գործում:
– Չեմ կարող ասել:
