ԲՀԿ-ական Աշոտ Տոնոյանին պատկանող «Տոնուս» ընկերությունից տուժած քաղաքացիները հույս ունեն, որ առաջիկա ամսվա վերջին իրենց խնդիրը վերջապես լուծում կստանա: Նրանք առանձին-առանձին հանդիպել են վերջերս Հայաստան վերադարձած «Արցախբանկ»-ի հիմնական բաժնետեր Հրաչ Կապրիելյանի հետ, որը խոստացել է լուծում տալ բնակիչների պահանջին:
«Նա խոստացավ, որ անպայման շենքը կվերանորոգեն և կհանձնեն բնակիչներին: Հիմա գործընթացը գնում է, պետք է հանձնաժողով կազմվի, հաշվարկ անեն, թե որքան գումար է ծախսվել շենքի վրա, որը դեռևս կիսակառույց է մնացել: Բոլոր աշխատանքները պետք է ստուգեն և նոր անցնեն շինարարությանը»,- «Առաջին լրատվական»,-ի հետ զրույցում ասաց «Տոնուս»-ից տուժած բնակիչներից Զոյա Պետրոսյանը՝ հավելելով, որ բանկն իրենց մեկ ամիս ժամանակ է տվել, որ սպասեն իրենց խոստումների ի կատար ածվելուն: «Այս մեկ ամիսը մենք սպասելու ենք, որ բանկն իր հաշվարկներն անի և տեսնի, թե որքան է բանկի կորուստը, որքան՝ քաղաքացունը: Նոր դրանից հետո մենք կհասկանանք՝ մեզ ճիշտ ուղղությա՞մբ են տանում, թե՞ էլի շարունակում են խաբել»,- նկատեց բնակչուհին:
Վերջինից հետաքրքրվեցինք՝ բավարարո՞ւմ է իրենց բանկի սեփականատեր գործարարի տված խոստումները։ «Խոստումները մեզ կբավարարեն այն ժամանակ, երբ դրանք կյանքի կկոչվեն, իրականություն կդառնան: Մասնավորապես՝ բնակարանները կնորոգվեն ու կհանձնվեն բնակիչներին, իսկ գումարի պահանջատերերը կստանան իրենց գումարները: Պայմանավորվածությունն այնպիսին է, որ գումարներից պահումներ կարվեն 15 տոկոս: 15 կպահեն, իսկ մնացածը կտան: Իսկ նրանց, ում բնակարան է հասնում, պետք է տարբերությունը մուծեն և ստանան սեփականության վկայականները»- հավելեց մեր զրուցակիցը:
Զոյա Պետրոսյանն ասաց, որ իրենք Աշոտ Տոնոյանից այլևս պահանջ չունեն: «Աշոտին Տոնոյանին պահանջ թող ՊԵԿ-ը ներկայացնի, թող երկրի կառավարությունը նրան պահանջ ներկայացնի, թող երկրի նախագահը պահանջ ներկայացնի, որ այսպիսի հանցագործի է պահում: Աշոտին սնանկ ճանաչեցին, մենք էլ ինչ պահանջենք Աշոտից: Մեր, ում գումարները գտնվում «Արցախ» բանկում, միակ հույսը այս Հրաչն է»:
Հիշեցնենք, որ վերջերս էլ, երբ «Տոնուսի» բնակիչները բողոքի ակցիա էին իրականացնում Սերժ Սարգսյանի տան մոտ, վերջինս նրանց ուղարկել էր «Հովիկի մոտ» (նախագահի աշխատակազմի վերահսկողական ծառայության պետ Հովիկ Հովսեփյանի մոտ): Տիկին Զոյայի խոսքով՝ նույն օրն իրենց անմիջապես ուղեկցել են Հովսեփյանի մոտ: «Ինքը խնդրեց մեկ ամիս ժամանակ տրամադրել իրենց: Ասաց՝ ինձ ժամանակ տվեք և ես քայլ առ քայլ կքայլեմ «Տոնուս»-ի բնակիչների հետ, կաշխատեմ օգտակար լինել: Ինքն այդպիսի խոստումներ տվեց մեզ, բայց, դե, այդ խոստումները մենք արդեն լսել ենք մի քանի անգամ»:
Հիշեցնենք նաև, որ «Տոնուսի» բնակիչներն այս պատմության մեջ հայտնվեցին այն բանից հետո, երբ 2006 թ. պայմանագիր կնքեցին «Տոնուս»-ի հետ, որպեսզի Դավթաշեն համայնքում բնակարաններ ստանան: Պայմանագրից հետո բնակիչները գումարները մուծեցին «Արցախբանկ»-ում, իսկ ավելի ուշ պարզվեց, որ «Տոնուս» ընկերությունը ճանաչվել է սնանկ, և բնակարանները հայտնվել են «Արցախբանկ»-ի տնօրինության տակ:
Լուսանկարը՝ News.am-ի
