ԱՄՆ պետքարտուղար Հիլլարի Քլինթոնը չորեքշաբթի օրը այցելել է Կահիրեի կենտրոնում գտնվող Թահրիր հրապարակ, որը բողոքի կենտրոն էր երկրի նախկին նախագահ Հոսնի Մուբարաքի ռեժիմի դեմ: Այս մասին հաղորդում է RBC-ն:
Քլինթոնին ուղեկցող եգիպտացիները պատմել են, թե ինչպես են զարգացել իրադարձությունները, որոնք բերեցին Մուբարաքի հրաժարականին, որը երկիրը կառավարել է 30 տարի:
Քլինթոնը Եգիպտոս է ժամանել երեքշաբթի օրը, որպեսզի իր աջակցությունը հայտնի նոր կառավարությանը: Ելույթ ունենալով Կահիրեում տեղի ունեցած մամուլի ասուլիսի ժամանակ` նա հայտնել է, որ Եգիպտոսը կարող է փոփոխություններ իրականացնել և «զարգացնել հեղափոխության արդյունքը»: Քլինթոնը դրական է գնահատել առաջիկայում նախագահական և խորհրդարանական ընտրություններ անցկացնելու ժամանակավոր իշխանությունների որոշումը:
Իր հերթին Եգիպտոսի Արտաքին գործերի նախարար Նաբիլ Ալ-Արաբին հայտնել է, որ Կահիրեն հույս ունի պահպանել սերտ հարաբերություններ Վաշինգտոնի հետ և հույս ունի նրա օգնությանը: Ինչպես ակնկալվում է ԱՄՆ պետքարտուղարը չորեքշաբթի օրը բանակցություններ կվարի Եգիպտոսի Բարձրագույն զինվորական խորհրդի նախագահ Հուսեյն Տանտաուիի և վարչապետ Իսամ Շարաֆի հետ:
Տարածաշրջան իր այցելության ժամանակ Քլինթոնը կժամանի նաև Թունիս: