Թուրքիայի վարչապետ Ռեջեփ Թայիփ Էրդողանի նոյեմբերին Բաքու կատարելիք ծրագրված այցը հետաձգվել է: Թուրքական կողմը դրա համար որպես պատճառ նշել է Ադրբեջանում առկա նախընտրական գործընթացը, ինչպես նաեւ Էրդողանի աշխատանքային խիտ գրաֆիկը: Սակայն որոշ փորձագետներ այլ կարծիքի են: Ըստ «Ազադլիգ» պարբերականի` բոլորովին չի բացառվում, որ նոյեմբերի 7-ին տեղի ունենալիք խորհրդարանական ընտրությունները կեղծվեն, եւ արդյունքում Ադրբեջանը հերթական անգամ լուրջ քննադատությունների թիրախ դառնա: Ինչպես երեւում է, Թուրքիայի կառավարությունում նույնպես տեղեկություններ կան` կապված Ադրբեջանում անցկացվող խորհրդարանական ընտրությունների նկատմամբ միջազգային հանրության վերաբերմունքի հետ: «Իրականում այդ տեղեկությունները պատահական չեն ի հայտ եկել: Դա ծագում է Ադրբեջանում առկա ընտրական մթնոլորտի հակաժողովրդավարական լինելու, նախընտրական իրավիճակի անբարենպաստ լինելու հանգամանքից: Փորձագետների կարծիքով, միջազգային կազմակերպությունների, հատկապես, ԵԱՀԿ պատրաստած եւ հրապարակած զեկույցները հիմք են տալիս ենթադրելու, որ ընտրությունները հակաժողովրդավարական պայմաններում կանցկացվեն: Նման ընտրությունից հետո Ադրբեջանի կառավարության հետ որևէ երկխոսություն կարող է ուժեղացնել ցանկացած ժողովրդավարական երկրի առաջնորդի նկատմամբ քննադատությունը: Բացի այդ, Բաքու այցելելով` Էրդողանը ստիպված կլինի ինչ-որ կերպ կարծիք հայտնել Ադրբեջանում անցկացվող ընտրությունների վերաբերյալ: Եթե նա խոսի ընտրությունները ժողովրդավարական նորմերին համապատասխան անցկացվելու մասին, ապա դա կարող է հետագայում Էրդողանի համար լուրջ խնդիր դառնալ: Միեւնույն ժամանակ, Թուրքիայի վարչապետի` Ադրբեջանում ընտրական գործընթացի բացահայտ քննադատությունը կարող է վնասել երկու երկրների միջև առկա հարաբերություններին: Իսկ դա Թուրքիայի կառավարության համար ցանկալի չէ: Այդ պատճառով Էրդողանը ստիպված է եղել հետաձգել այցը եւ դա բացատրել է իր աշխատանքային գրաֆիկի ծանրաբեռնվածությամբ, ինչպես նաեւ` Ադրբեջանում ուշադրությունը ընտրությունների վրա սևեռված լինելու հանգամանքով»,- եզրահանգել է «Ազադլիգ»-ի հոդվածագիրը: