Լուրեր
Նոր կառավարություն՝ խաղի հավասար պայմաններ. Մի՞ֆ, թե՞ իրականություն
  • 20:41
  • 2014-05-26
  • Դիտումներ՝ *

«Առաջին լրատվական»«Դիսկուրս» հաղորդաշարի այսօրվա հյուրերն են Հայաստանի գործատուների միության նախագահ Գագիկ Մակարյանն ու Հանրապետական խորհրդարանական խմբակցության քարտուղար Գագիկ Մինասյանը:

Գ.Մակարյանն անցած շաբաթ ներկա է եղել վարչապետի և գործարարների այն հանդիպմանը, որի ժամանակ Հովիկ Աբրահամյանը հայտարարել էր, թե այսուհետ բոլորը պետք է աշխատեն նոր խաղի կանոններով՝ հավասար դաշտում: Եվ որ այդ նոր պայմանների իրագործումը սկսելու են իրենից և իր մերձավորներից:

«Վարչապետն առաջարկեց, ինչ եղել է, գիծ գծենք, և ինչ-որ մի պահից սկսած՝ մենք հաշվարկման նոր ձև ենք սահմանում և արդեն խոսենք, թե ինչպես կարող ենք համագործակցել և միմյանց վստահել: Միաժամանակ նաև առաջարկեց, որ մինչև հուլիսի 1-ը փորձենք ընդունել այդ կեցվածքը: Դա հատկապես վերաբերում էր խոշոր բիզնեսի ներկայացուցիչներին: Նա նաև ասաց, թե հուլիսի 1-ից փաստաթղթավորման առումով հնարավոր է՝ ստուգումներ իրականացվեն, ավելի խստացվեն: Եվ անմիջապես հանձնարարեց ֆինանսների նախարարին հետևել այդ հարցին: Ասաց նաև, որ իրենից, իր մերձավորներից ու գործընկերներից սկսած՝ փորձելու են հետևել այդ օրինակին, և խտրականություն չի դնելու կողմերի միջև»,- «Առաջին լրատվական»-ի հետ զրույցում ասաց Գ.Մակարյանը:

Նրա խոսքերով՝ այդ պահին գործարարները ավելի շատ սպասողական, կաշկանդված վիճակում էին, դեռ պատրաստ չէին անկեղծանալ, հավանաբար այն պատճառով, որ չէին հավատում Հ.Աբրահամյանի խոսքերին: Գ.Մակարյանը նաև ավելացրեց, որ ներկաներից ոմանք ընդհանրական խնդիրներ էին բարձրաձայնում, ոմանք վարչապետին հաճոյախոսություններ էին անում, իսկ մի քանիսն էլ, առիթից օգտվելով, տեղում փորձում էին լուծել իրենց սեփական խնդիրները:

«Ես նույնպես ելույթ եմ ունեցել և մի քանի հարց եմ կարևորել: Ես շարժվեցի նախագահի դիտողությունների սկզբունքով: Իմ ելույթը բաժանեցի երեք մասի: Վստահության, տնտեսական աճի և տնտեսական ռեֆորմների խնդիրները»,- ասաց Գ.Մակարյանը:

Եթե Հ.Աբրահամյանը հայտարարում է, որ այսուհետ պետք է խաղի նոր կանոններ սահմանել, և դա պետք է սկսել իրենից ու իր մերձավորներից, արդյո՞ք դա չի նշանակում, որ ՀՀ իշխանությունները վարչապետի մակարդակով ընդունում են, որ մինչև այժմ հավասար պայմաններ չեն եղել: «Ես բոլորովին այդ կարծիքին չեմ: Օրենքի առաջ բոլորն են հավասար, և օրենքը գերակա է բոլորի համար: Ինչ վերաբերում է ստվերային տնտեսությանը, կարծում եմ՝ աշխարհում չկա մի երկիր, որտեղ գոյություն չունի ստվեր, մի տեղ՝ քիչ, մի տեղ՝ շատ, որի մեջ մտնում է նաև Հայաստանը»,- ասում է Գ.Մելլիքյանը:

Վերջինս նաև գտնում է, որ Հ.Աբրահամյանի հայտարարությունները գուցե սկզբնական շրջանում այնքան էլ վստահություն չեն ներշնչել, բայց համոզված է, որ հավատը կվերականգնվի, գործարարները կսկսեն ավելի լուրջ վերաբերվել և ավելի շատ ներդրումներ կատարել:

  • Դիտումներ՝ *