Գյուղնախարարության բուսաբուծության վարչության պետ Գագիկ Մանուչարյանը, անդրադառնալով Սերժ Սարգսյանի վերջին հանձնարարականներին, ասաց, որ գյուղնախարար Սերգո Կարապետյանի հրամանով 5 տեղակալներից յուրաքանչյուրը կցվել է երկու մարզի։ Իսկ սրա շարունակությունը պետք է լինի այն, որ մարզերի տարածաշրջաններին կկցվեն վարչության պետերը և, հնարավորության սահմաններում համայնքներին կկցվեն մասնագետներ։ Պարբերաբար մասնագետները կայցելեն մարզեր, իսկ նախարարի տեղակալները՝ ավելի հաճախ։ Արդյունքում վեր կհանվեն համայնքներում եղած խնդիրները, և այդ մասին տեղեկատվություն կներկայացվի նախագահին։
Մեր այն հարցին՝ անձամբ գյուղացուց հետաքրքրվո՞ւմ են, թե նրանք այսօր ինչ խնդիրներ ունեն, Գագիկ Մանուչարյանը պատասխանեց. «Խնդիրները մեզ հայտնի են, բայց ավելի խոր ուսումասիրելու, լուծման ելքերը գտնելու համար անհրաժեշտ է, որ խոսենք գյուղացու հետ։ Մի բան էլ գյուղացին մեզ պետք է առաջարկի։ Այնպես չէ, որ անընդհատ կառավարությունը պետք է առաջարկի։ Կառավարությունը կարող է մի բան առաջարկել, և գյուղացու համար դա ընդունելի չլինի։ Ստեղծված իրավիճակում գյուղնախարարությունը իր խոսքը պետք է ասի, գյուղացին՝ իր խոսքը, և խնդիրների լուծման համար գանք ընդհանուր հայտարարի։ Տեսնենք, թե կառավարությունը կամ նախարարությունը ինչ ելքեր կարող է առաջարկել»։
Իսկ թե երբ այս երկխոսությունը կյանքի կկոչվի՝ Գագիկ Մանուչարյանի ասելով՝ առաջիկայում նախարարի հրամանը, և «երբ ձյան ծածկոցը հալվեց ամբողջությամբ, պետք է գնանք մարզեր»։