«Րաֆֆի Հովհաննիսյանի հայտարարած հացադուլը տագնապի կոչ է անկախությունից հետո Հայաստանում տիրող ծանրագույն վիճակի մասին: Այս կոչը ուղղված է թե՛ իշխանությանը, թե՛ հասարակությանը»,- հայտնում է «Ժառանգություն» կուսակցության վարչության նախագահ Ռուբեն Հակոբյանը:
«Իշխանության քայլերը համարժեք չեն պետության իրավիճակին: Այս քաղաքականությունը շարունակելու փորձ է արվում, ինչի ապացույցը կոալիցիոն հուշագրի ստորագրումն է: Շարունակվում է կոռուպցիան, արտագաղթը, բռնադատում են քաղաքացու իրավունքները և օգտագործում բոլոր լծակները իշխանության վերարտադրումը ապահովելու համար»,- իշխանության մարտավարությանը այս բնորոշումն է տալիս Ռուբեն Հակոբյանը:
Բանախոսը հետևյալ երեք ուղիներն է տեսնում այս իրավիճակը հաղթահարելու համար. իշխանության կողմից արտահերթ ընտրությունների կազմակերպում, ընդդիմության կողմից ժողովրդի համակարգում և իշխանափոխություն և երրորդ` սոցիալական բունտ, որի սերմերը կան Գյումրիում, Վանաձորում և այլ քաղաքներում: «Իհարկե, նախընտրելի տարբերակը արդար, թափանցիկ ընտրությունների անցկացումն է»,- ասում է Հակոբյանը:
Անդրադառնալով Արամ Մանուկյանի այն մեկնաբանությանը, թե Րաֆֆի Հովհաննիսյանի հացադուլը անպատեհ է` Ռուբեն Հակոբյանը ասաց. «Կոչ եմ անում բոլոր ընդդիմադիր ուժերին համախմբվել, հանրահավաքներով չհիասթափեցնել ժողովրդին, ոչ մի ուժ մենակ չի կարող փոփոխություններ մտցնել»:
Ստեփան Սաֆարյանը հավելեց. «Երբ օրեցօր դատարկվում են Հայաստանի բնակավայրերը, մարդիկ հեռանում են երկրից երկրաչափական պրոգրեսիայով, Րաֆֆի Հովհաննիսյանի քայլը նույնիսկ ուշացած է»: