Վերջին օրերին հանրության շրջանում աղմուկ է բարձրացել կառավարության մի որոշման առիթով, ըստ որի՝ 63 կոթող է թույլատրվել մարզերից բերել Հայաստանի պատմության թանգարան՝ ՀՀ անկախությանը նվիրված ժամանակավոր ցուցահանդես կազմակերպելու համար:
Հանրային հեռուստաընկերության «Հարցազրույց» հաղորդման եթերում թանգարանի տնօրեն Անելկա Գրիգորյանն ասել է, որ իրենք տեղափոխել են ընդամենը 51-ը, քանի որ մարզային այցելությունների ժամանակ տեսել են, որ մյուս 12 հուշարձանները պատշաճ վիճակում են՝ ի տարբերություն այդ 51-ի, որոնք վթարված են: «Երբ մենք ասում ենք վթարված, տեղաշարժված բեկորներ, դրա վկայությունն այն է, որ մեր բերած կոթողներից ոչ մեկն իր պատվանդանի վրա չէ: Մենք բերել ենք կոթողներից սյուներ: Ընտրությունը կատարվել է պատմության թանգարանում՝ երկար ուսումնասիրությունների շնորհիվ: Մեր նպատակն էր տեղաշարժված, վթարված կոթողները կարգի բերել և փրկել վնասից»,- ասել է Անելկա Գրիգորյանը:
Հաղորդմանը մասնակից՝ «Բնատաճար» ՀԿ–ի նախագահ Ապրես Զոհրաբյանը տարակուսանք է հայտնել, որ պետական մարմինը թույլ է տալիս հուշարձանները տեղափոխել առանց քննարկում անցկացնելու. «Թանգարանը ներկայացրել է մոտ 110 հուշարձան բերելու հայտ, նախարարությունը 63 է թույլ տվել: Ինձ մոտ տպավորություն է, թե շուկայական հարաբերություններ են՝ տուր այսքանը, չէ՝ այսքանն եմ տալիս»: Դա պետք է լիներ ճշգրիտ վերլուծությունների հիման վրա»:
Թանգարանի տնօրենն այս դիտարկմանը պատասխանել է, որ մասնագետներն են որոշում, և հասարակական քննարկման կարիք չկար: Նա վստահեցրել է, որ հուշարձանները վերանորոգելուց հետո կվերադարձվեն իրենց տեղերը: «Ես կուզենայի, որ մենք տիեզերական հայրենասիրությամբ տեղին կառչած մնալու մարմաջից ազատվեինք»,- ասել է նա:
Ապրես Զոհրաբյանն էլ իր հերթին նկատել է, որ Հայաստանում կան բազմաթիվ հուշարձաններ, որոնց մի մասը վթարված է, և բոլորն անհնար է տեղավորել Երևանում: Նա նաև նշել է, որ, միևնույն է, փրկելուց հետո վերադարձնելու են կրկին նույն անմխիթար պայմաններում տեղադրելու, ինչին ի պատասխան՝ Անելկա Գրիգորյանն ասել է, որ մարզային իշխանությունների հետ այժմ քննարկում են վերադարձնելիս դրանց տեղադրման ճիշտ վայրը:
