խորհրդարանական ճեպազրույցների ընթացքում ՀՅԴ-ական Արմեն Ռուստամյանը հետաքրքիր հայտարարություն է արել՝ ասելով, թե քանի դեռ հստակ չէ Տիգրան Սարգսյանի հեռացման պատճառը, ապա անորոշություն է մնալու, և հարց է առաջանալու, թե ինչու փոխվեց կառավարությունը: Ռուստամյանը մեկն է ոչիշխանական քառյակից, որը հայտարարում էր Տիգրան Սարգսյանի հրաժարականի կամ պաշտոնանկության պահանջի մասին, նույնիսկ շուրջօրյա հանրահավաքներ նշանակեցին այդ պահանջով: Բանն իհարկե հանրահավաքների չհասավ, ու Սարգսյանը Սարգսյանին պաշտոնանկ արեց ավելի վաղ: Ընդ որում՝ դրանից հետո քառյակի ուժերից ոմանք հայտարարեցին, թե դա իրենց հաղթանակն է, իրենց ճնշման արդյունքը, և իշխանությունը վախեցավ, որ հարյուր հազարներ կհանեն փողոց:
Հիմա Արմեն Ռուստամյանը հայտարարում է, թե քանի դեռ հայտնի չէ՝ ինչու փոխվեց Տիգրան Սարգսյանը, հարցը մնում է, թե ինչու եղան փոփոխությունները: Այսինքն՝ Տիգրան Սարգսյանի պաշտոնանկությունը, ըստ Արմեն Ռուստամյանի, կապ չունե՞ր քառյակի պահանջի հետ: Փաստորեն նրանք, ովքեր հենց նույն քառյակից ասում էին, որ վարչապետի պաշտոնանկությունն իրենց ճնշման արդյունք էր, երևակայու՞մ էին:
Պետք է արձանագրել, որ իրավացին, իհարկե, Ռուստամյանն է, որովհետև եթե վարչապետի պաշտոնանկությունը քառյակի ճնշման արդյունք էր լինելու, ապա առնվազն տարօրինակ էր, որ քառյակն իր հաջողությունը չփորձեց զարգացնել: Մյուս կողմից, երևի թե չէր էլ կարող, որովհետև այդ դեպքում պետք է հարց առաջանար վարչապետի և կառավարության քառյակի տարբերակի մասին: Այսինքն՝ պետք է, օրինակ, հարյուր հազարներ հավաքեին Ազատության հրապարակում և Սերժ Սարգսյանից պահանջեին վարչապետ նշանակել Պողոսին, իսկ Պետրոսներին էլ նշանակել նախարար: Իսկ դա արդեն էական հարցեր էր առաջացնելու քառյակում: Նույնիսկ Հովիկ Աբրահամյանի թեկնածության շուրջ թեթև քննարկումները բավական հարցեր առաջ բերեցին՝ այն իմաստով, որ, օրինակ, Տեր-Պետրոսյան-Ծառուկյան-Հովհաննիսյան հանդիպմանը, երբ Աբրահամյանը վարչապետ էր նշանակվելու, ՀՅԴ-ն չմասնակցեց ու հայտարարեց, որ այդպիսի հանդիպման իմաստ չի տեսնում: Հետևաբար, Տիգրան Սարգսյանի պաշտոնանկությունը գուցե թե քառյակից որևէ մեկի հաջողությունն էր, բայց ակնհայտորեն՝ ոչ քառյակի:
Այլ կերպ ասած, բացատրություններ պահանջելով Տիգրան Սարգսյանի կառավարության պաշտոնանկության պատճառների վերաբերյալ՝ Արմեն Ռուստամյանը, ըստ էության, հարցեր է բարձրացնում ոչ միայն իշխանությունների, այլ նաև ոչիշխանական ուժերի, այսպես ասած, դաշնակիցների շրջանում: Արմեն Ռուստամյանն էլ, ըստ երևույթին, ակնարկում է հենց այդ մասին, որ իրենց համար կան անորոշություններ և ՀՅԴ-ի համար հարցեր կան քառյակի գործունեության հետ կապված: ՀՅԴ-ն ակնարկում է շատ հարցերի վերաբերյալ բացատրության անհրաժեշտության մասին, գուցե թե այն տեսանկյունից, որ Հովիկ Աբրահամյանի կառավարության նշանակումից հետո քառյակի ուժերի պահվածքում ընդհանուրը եղել է միայն այն, որ որոշել են դեմ չքվեարկել Հովիկ Աբրահամյանի կառավարության ծրագրին, ինչը, սակայն, ոչ մի խնդիր չի առաջացրել այդ ծրագիրը խորհրդարանում ընդունելու տեսանկյունից, և այս առումով հարց է առաջանում, թե քառյակից ով ինչ ստացավ Տիգրան Սարգսյանի պաշտոնանկությամբ և Հովիկ Աբրահամյանի նշանակումով:
