Հովիկ Աբրահամյանի գլխավորած կառավարությանն այսօր գոյություն ունեցող տնտեսական աճը չի բավարարում: Էկոնոմիկայի նորանշանակ նախարար Կարեն Ճշմարիտյանը «Առաջին լրատվական»-ի հետ զրույցում ասաց, թե իրենց նպատակը «դրությունը կայունացնելն է և ավելի արագ զարգացման համար հիմքեր ստեղծելը»: «Այսինքն՝ մենք պետք է կարողանանք այնպիսի աճի հասնել, որ աղքատության շեմը կարողանանք հասցնել նվազագույն մակարդակի»,- ասաց նա:
Եվ զարգացման համար նոր կառավարությունն արդյունաբերությունից առավել թիրախավորել է հատկապես գյուղատնտեսության ոլորտը: «Տրամաբանությունն այն չէ, որ արդյունաբերությունն իր ծավալով մեծ է: Տրամաբանությունն այն է, թե մեզ համար որն է առաջնայինը: Այսօր սպառման դաշտ ապահովելն է ամենակարևորը: Գյուղատնտեսությունը պետք է դարձնել ավելի արտադրողունակ: Գյուղի բնակիչը պիտի դառնա քաղաքացի, որը զբաղվի գյուղատնտեսությամբ: Սա հեռավոր նպատակ է»,- ասում է Կ. Ճշմարիտյանը:
Իսկ գյուղատնտեսության ոլորտում նա կարևորեց հատկապես ձկնաբուծությունն ու այդ ոլորտում առկա նորարարությունները: «Դանիայում, օրինակ, ձկան աճեցման 2000 խմ ավազանը տարեկան օգտագործում է 50 լիտր լրացուցիչ ջուր: Այսինքն՝ այնպիսի տեխնոլոգիա է ներդրված, որ ջրի շրջապտտույտը մաքրվում է, ձուկը աճում է, և ընդամենը տարվա կտրվածքով գոլորշացման մակարդակն է ապահովվում»,- ավելացրեց նա:
Հիշեցնենք, որ Հայաստանում ձկնաբուծական մեծ ընկերություն ունի Հ.Աբրահամյանը, որն անխնա ջրօգտագործման պատճառով հայտնվել էր նախկին կառավարության ուշադրության կենտրոնում: Եվ չի բացառվում, որ գյուղատնտեսության և ձկնաբուծության ոլորտը թիրախավորելով՝ նորանշանակ վարչապետը պարզապես ցանկանում է զարկ տալ իր բիզնեսին:
