Թուրքական Zaman թերթի փոխանցմամբ, Ռուսաստանի փոխվարչապետ Իգոր Սեչինը, ելույթ ունենալով ռուս-թուրքական գործարար ֆորումում, անդրադարձել է ռուս-թուրքական ջերմ հարաբերություններին` ընդգծելով դրանցում Էրդողանի մեծ ավանդը.
«Ռուսաստանն ու Թուրքիան գտնվում են ճշմարիտ ուղու վրա: Էրդողանի այցը համընկավ Մոսկվայում կնքված ռուս-թուրքական պայմանագրի 90-րդ տարելիցին: Էրդողանը վիթխարի ջանքեր է գործադրել ռուս-թուրքական հարաբերությունների զարգացման համար: Ես նաև շնորհակալ եմ արտգործնախարար Ահմեդ Դավութօղլուին և իմ թուրք գործընկերներին:
Նախորդ տարի երկու երկրների միջև ապրանքաշրջանառությունը կազմել է 25 միլիարդ դոլար, սակայն մենք մտադիր ենք այդ ցուցանիշն ավելկացնել ևս 10 միլիարդ դոլարով:
Երկու երկրներն իրագործում են մի շարք ռազմավարական նախագծեր, որոնց թվում է նաև Ռուսաստանի կողմից ատոմակայանի կառուցումը Թուրքիայում: Այդ նպատակով Ռուսաստանը պետք է 20 միլիարդ դոլարի ներդրում կատարի Թուրքիայում: Մենք Թուրքիային շնորհակալ ենք դա մեզ վստահելու համար:
Ռուսաստանը գնալով ավելացնում է Թուրքիային հատկացվող բնական գազի ծավալը: Բացի այդ, մենք միացել ենք «Սամսուն-Ջեյհան» նավթամուղին, որի կառուցման աշխատանքները շարունակվում են:
Թուրքական շինարարական ընկերությունները մեծ մասնակցություն են ցուցաբերում 2014 թվականին Սոչիում կայանալիք ձմեռային օլիմպիական խաղերին պատշաճ կերպ դիմավորելու նպատկով ենթակառուցվածքների ստեղծման գործընթացին:
Ինչ վերաբերում է զբոսաշրջությանը, ապա գնալով աճում է նաև Թուրքիա այցելող ռուս զբոսաշրջիկների թվաքանակը: Անցյալ տարի Թուրքիա է այցելել մոտ 3 միլիոն ռուս զբոսաշրջիկ, այս տարի ակնկալում ենք, որ այդ ցուցանիշը կկազմի 4 միլիոն»:
Հիշեցնենք, որ անցյալ տարվա նոյեմբերի սկզբին թուրքական լրատվամիջոցները, վկայակոչելով բրիտանական Financial Times թերթը, գրում էին, որ Արարատ լեռը Լենինի նվերն է Թուրքիայի Հանրապետության հիմնադիր Մուսթաֆա Քեմալ Աթաթուրքին: