Ավարտական դասարանի աշակերտներն արդեն վերջին զանգի պատրաստությունները ավարտել են: Սցենարը կա, տեսանկարահանելու համար օպերատորներին հրավիրել են: Իրենց պնդմամբ՝ ծնողները ծախսերին դեմ չեն: Գումարները ծնողկոմիտեն է հավաքում: Շրջանավարտները հատկապես սպասում են ավարտական երեկոյին՝ «վիպուսկնոյին»: Այդ օրը յուրաքանչյուրն ուզում է տարբերվել: Գեղեցիկ սանրվածք, դիմահարդարում, ճոխ մեքանա՝ վերջին դասի. սրանք ավարտական երեկոյի անբաժանելի մասնիկներն են: Ընդ որում՝ շրջանավարտները շուկայից հագուստ, նախորդ տարիների համեմատ, քիչ են գնում, հիմնականում նախընտրում են բրենդային խանութներից:
Այս օրերին ոչ միայն խանութ-սրահներում են շրջանավարտների ու նրանց ծնողների համար առաջարկներ լինում, այլև ռեստորաններում: Տարբեր ռեստորաններ իրենց գինն ունեն: Մեկ աթոռի գինը սկսվում է 7 հազար դրամից՝ հասնում մինչև 40 հազար դրամի, ավելի բարձր գնային առաջարկներ ևս կան: Գինը պայմանավորված է նրանով, թե ինչ համերգային ծրագիր է ներառվելու: Օրինակ՝ օպերատորների ծառայությունն էլ մեկ աշակերտի համար արժենում է ամենաքիչը 12 հազար դրամ: Այս տարի շուրջ 25 հազար շրջանավարտ կա, եթե մեկ շրջանավարտի համար մատչելի գներով հաշվենք ավարտական երեկոն՝ կարժենա մոտ 230 հազար դրամ: Սրան կարող ենք գումարել նաև այն ծնողների ծախսերը, որոնք ևս երեխաների հետ հավասար պատրաստվում են ավարտական երեկոյին՝ կրկին հագուստ, սանրվածք, ռեստորանի աթոռի գումար: Այսինքն՝ 230 հազարը կկրկնպատկվի:
Հայաստանում ընդունված է այդ օրը ամեն ինչ ճոխ անել: Ծնողներից շատերը ջանք ու եռանդ չեն խնայում իրենց ունեցվածքը ցուցադրելու համար, մյուսներն էլ հետ չեն ուզում մնալ, անգամ պարտքեր են կուտակում:
«Առաջին լրատվական»-ը թեմայի վերաբերյալ զրուցել է շրջանավարտների հետ, այցելել գեղեցկության և հագուստի խանութ-սրահներ:
Առավել մանրամասն՝ տեսանյութում