Քիչ առաջ ավարտվեց իշխող Հանրապետական կուսակցության գործադիր մարմնի նիստը: Նիստից հետո ՀՀԿ խոսնակ Էդուարդ Շարմազանովը լրագրողների հետ ճեպազրույցում ասաց, որ քննարկվել են կուսակցության համագումարի հետ կապված կազմակերպչական հարցեր:
Ինչ վերաբերում է այսօր խորհրդարանում քվեարկության բերված ոչ սթափ պատգամավորներին՝ Շարմազանովն ասաց. «Ես խորհրդարանում ոչ սթափ մարդ չեմ տեսել, ամբողջ օրը դահլիճում եմ եղել, հետո գնացել իմ գործընկերոջ ցուցահանդեսին, տեղյակ չեմ»։
Հարցին, թե ինչո՞ւ այլ կուսակցությունների չեն հրավիրել համագումարին, Շարմազանովը պատասխանեց. «Սա հաշվետու համագումար է, հաշվետու համագումարի ընթացքում քննարկելու ենք այն խնդիրը, որ մեր կուսակցությանը, կուսակցության կառույցներին է վերաբերում, սա նախընտրական համագումար չէ, մենք երբեք հաշվետու համագումարին այլ կուսակցությունների անդամներին չենք հրավիրել: Մենք էլ շատ դեպքերում չենք հրավիրվել այլ կուսակցությունների համագումարին: Լինելու է կուսակցության գործադիր մարմնի, խորհրդի ընտրություն»:
Նա նաև անդրադարձավ այն հանգամանքին, որ ոչ իշխանական ուժերն այսօր չմասնակցեցին կառավարության ծրագրի քվեարկությանը, և ասաց. «Անցյալը փառաբանելու ժամանակը չէ, այսօր գործ անելու ժամանակն է, ժողովուրդը մեզնից ոչ թե պուպուշ բառեր է սպասում, այլ կոնկրետ աշխատանք»։