Մինչ այս խաղը Չեմպիոնների լիգայի փլեյ օֆֆ փուլում միայն մեկ անգամ էր առաջին խաղում սեփական հարկի տակ պարտություն կրած թիմին հաջողվել դուրս գալ հաջորդ փուլ: Այդ թիմն Ամստերդամի «Այաքս»-ն էր, որ 1996 թվականի Չ.լ. խաղարկության կիսաեզրափակիչում սեփական հարկի տակ 0:1 հաշվով զիջեց «Պանատինայկոս»-ին, սակայն Հունաստանում 3 անպատասխան գնդակ ուղարկեց մրցակցի դարպասն ու դուրս եկավ եզրափակիչ: Հիշո՞ւմ եք՝ ով էր 96 թ. «Այաքս»-ի մարզիչը: Այո, Լուի վան Գալը, ով այժմ գլխավորում է «Բավարիա»-ն:
Արդեն 4-րդ րոպեին լիգայի գործող չեմպիոններին հաջողվեց հավասարեցնել ընդհանուր դիմակայության հաշիվը. Գորան Պանդևի փոխանցումից հետո Կրաֆտի դեմ միայնակ մնացած Սամուել Էտոոն դարպասապահի ոտքերի արանքով գնդակն ուղարկեց դարպասը:
«Ինտեր»-ի համար ավելի լավ սկիզբ չէր կարելի պատկերացնել: Ընդունած գոլից հետո մյունխենցիները նետվեցին առաջ: Հյուրերը որոշ ժամանակ հաջողությամբ պաշտպանվեցին, սակայն Ռոբենի ու Ռիբերիի անցումներն ու փոխանցումները գնալով ավելի վտանգավոր էին դառնում: Չնայած առաջին պատասխան գոլը ծնվեց Ռոբենի անմիջական մասնակցությամբ, բայց դրվագի հերոսն ամենևին էլ հոլանդացին չէր. նրա հարվածից հետո Սեզարը մանկական սխալ գործեց, ինչից անհապաղ օգտվեց Մարիո Գոմեսը:
1:1 հաշիվը ձեռնտու էր տանտերերին, սակայն «Բավարիա»-ն շարունակում էր առաջին համարով խաղալ ու ճնշում գործադրել Սեզարի դարպասին, ինչը, ի վերջո, իր արդյունքը տվեց: 31-րդ րոպեին Ռոբենի փոխանցումից հետո Մոտտան փորձում էր տուգանային հրապարակից հեռացնել գնդակը, սակայն այն հայտնվեց Մյուլլերի մոտ, որը հմտորեն գրավեց բրազիլացու դարպասը: Այն, որ մնացած 15 րոպեների ընթացքում հաշվի տարբերությունը չմեծացավ, միայն հրաշք կարելի է համարել: Գոմեսը Սեզարի հետ պայքարում հաղթող դուրս եկավ, Ռանոկիան դարպասային գծի վրայից փորձեց հեռացնել գնդակը, այն դիպավ Մյուլլերի ոտքին, և միայն դարպասաձողն օգնեց իտալացիներին: Դա առաջին խաղակեսում մյունխենցիների միակ հնարավորությունը չէր: Կարծում եմ՝ կձանձրացնի բոլոր պահերը թվարկելը. Դրանք չափազանց շատ էին:
Ընդմիջումից հետո «Բավարիա»-ն շարունակում էր գրոհել ու չօգտագործել իր հնարավորությունները: Չի կարելի ասել, թե «Ինտեր»-ն անատամ էր գործում: Լեոնարդոյի սաների հակագրոհները նույնպես շատ վտանգավոր էին, նրանցից մեկի ժամանակ 63-րդ րոպեին Ստանկովիչին փոխարինած 18-ամյա Կոուտինյոն ճշգրիտ փոխանցում կատարեց դեպի Սամուել Էտոոն, որը գնդակը նուրբ փոխանցումով հարվածային դիրք դուրս բերեց Սնեյդերին: Հոլանդացու հարվածից հետո Կրաֆտը դիպավ գնդակին, սակայն չկարողացավ այն ինչպես հարկն է շեղել` 2:2:
«Ինտեր»-ի մոտ քառորդ եզրափակիչում հայտվելու հույս արթնացավ: Եվ այստեղ Լուի վան Գալը կոպիտ սխալ թույլ տվեց: Վստահ եմ, ոչ ոք, հնարավոր է՝ նաև հոլանդացի մարզիչը, չհասկացավ՝ ինչու Ռոբենին փոխարինեց Ալթինթոփով: Այդուհետ ոչ միայն մյունխենցիների հարձակման աջ եզրն ամբողջությամբ պասսիվացավ, այլև չկար մեկը, որ կարողանար գնդակը երկար պահելով՝ ժամանակ շահեր ու պահպանել ձեռնտու արդյունքը: Փոխարենը «Ինտեր»-ը կորցնելու բան չուներ, և Լեոնարդոն բոլոր ուժերը կենտրոնացրեց հարձակման վրա: Հիմնական ժամանակի ավարտին ընդամենը 2 րոպե էր մնում, և կրկին «Բավարիա»-ի պաշտպանության կենտրոնը ձախողվեց: Բրենոն թույլ տվեց Էտոոին գնդակն ստանալ սեփական տուգանային հրապարակի մատույցներում, կամերունցին հարվածային դիրք դուրս բերեց Պանդևին, որը ամբողջ ուժով հարվածեց գնդակին ու հաղթանակ պարգևեց իր թիմին:
Իսկ ո՞ւր էր Ռոբենը, ում համար երկու րոպե «սպանել»-ը հաստատ ամենաբարդ խնդիրը չէ, իսկ ինչո՞ւ նրա փոխարեն Ալթինթոփը և ոչ թե, օրինակ, Տիմոշչուկը, որը շատ ավելի արդյունավետ է պաշտպանվում: Ինչևէ, Լուի վան Գալի «Բավարիա»-ն պարտվեց և կորցրեց այս մրցաշրջանում որևէ մրցանակ նվաճելու իր վերջին հնարավորությունը, իսկ Լեոնարդոյի «Ինտեր»-ը քառորդ եզրափակիչում է: