Քիչ առաջ հայտնի է դարձել, որ Բահրեյնի իրավապահներն ու զինվորականները հարձակվել են մայրաքաղաք Մանամայի կենտրոնում ցուցարարների կողմից կառուցված վրանային ճամբարի վրա: Ինչպես հաղորդում է France Presse գործակալությունը, իշխանությունները կիրառում են արցունքաբեր գազ և այլ հատուկ միջոցներ: Ականատեսների վկայությամբ, Մարգարիտի հրապարակում, որտեղ տեղակայված է եղել ճամբարը, լսվում են պայթյուններ:
Al-Jazeera հեռուստաալիքը հաղորդում է, որ իշխանություններն օգտագործում են տանկեր և ուղղաթիռներ: Ծանր տեխնիկան մաքրում է ցուցարարների կողմից կառուցված բարիկադները: Հեռուստաալիքի տվյալներով, կիրառվել է նաև հրազեն: Ցուցարարները լուրջ դիմադրություն չեն ցուցաբերել: Հայտնի չէ՝ արդյոք կա՞ն տուժածներ և զոհեր:
Հիշեցնենք, որ երկու օր առաջ Բահրեյն մտցվեցին մի շարք արաբական երկրների զորամիավորումներ` տեղի իշխանություններին աջակցություն ցուցաբերելու և երկրում կարգ ու կանոնը վերականգնելու համար: Այդ օրերին Բահրեյնի իրավապահներն այլևս ի վիճակի չէին վերահսկելու իրավիճակը երկրում: Ցուցարարներին հաջողվել էր մայրաքաղաքի կենտրոնում ամբողջությամբ վերցնել վերահսկողությունը: Մարտի 15-ին Համադ իբն Իսա Ալ Խալիֆան հայտարարեց երկրում արտակարգ դրություն մտցնելու մասին: Ավելի ուշ հայտնի դարձավ, որ Բահրեյնում սպանվել է սաուդյան մեկ զինվորական: