«Առաջին լրատվական»-ի տեղեկություններով, Ազգային անվտանգության քննչական ծառայությունը, որը մեկ ամսից ավելի է՝ քննում է քրեական հեղինակություն Թևոսիկի եղբոր՝ Արթուր Սաֆարյանի սպանության գործը, նոր ապացույցներ է հայտնաբերել: Խոսքը 2 հեռախոսի մասին է, որոնք պատկանել են սպանված և դիտահորը նետված Մովսես Ներսիսյանին: Հեռախոսները հայտնաբերվել են հենց այդ դիտահորի հարակից տարածքից:
Նշենք, որ, ըստ նախաքննական մարմնի, Իսրայել Սարգսյանը՝ Իսոն, Մովսես Ներսիսյանին՝ Մոսոյին սպանել էր նախորդ սպանության հետքերը թաքցնելու համար և դիակը նետել էր Քանաքեռավան գյուղի կոյուղու դիտահորերից մեկը: Նախաքննական մարմինը դրա մասին վկայող ձայնագրություն ունի՝ Իսոյի և Տիգրանի հեռախոսազրույցը, որը մինչ օրս համարվում էր գործով միակ ապացույցը: Հենց այդ ձայնագրության մեջ ևս հիշատակվում է հեռախոսների մասին:
«Լավ եմ արել, սպանել եմ, հեռախոսն էլ ջարդել շպրտել եմ»,-ասում է Իսոն: Հեռախոսները հայտնաբերելը նախաքննական մարմնին լրացուցիչ վստահություն է տալիս պնդելու, որ Մոսոն սպանված է, և այս պահին ավելի են ակտիվացվել դիակի որոնողական աշխատանքները:
Նշենք, որ դիակի հայտնաբերումից է կախված Իսոյի հետագա ճակատագիրը, քանի որ եթե չկա դիակ՝ չկա սպանություն: Չկա սպանություն՝ չկա պատասխանատվություն:
Նշենք նաև, որ գործը ԱԱԾ տեղափոխվելուց հետո քննչական մարմինը, Մոսոյի դիակը փնտրելուց բացի, ավելի շատ կենտրոնացել է Արթուր Սաֆարյանի սպանության պատճառների բացահայտման վրա, և արդեն իսկ հետաքրքիր վարկածներ կան: Մասնավորապես, որ Արթուր Սաֆարյանի սպանությունը կապված է նրա եղբոր՝ Թևոսիկի կողմից իրականացված որոշ գործարքների հետ, որտեղ բավական խոշոր գումարներ են շրջանառվել:
Նշենք նաև, որ այս գործով արդեն իսկ կան որոշ փորձաքննությունների պատասխաններ, որոնք ևս հետաքրքիր մանրամանսեր են պարունակում: Իսրայել Սարգսյանի պաշտպան Գայանե Գալոյանը, սակայն, «Առաջին լրատվական»-ի հետ զրույցում չցանկացավ մանրամասնել, թե ինչ է պարզվել այդ փորձաքննությունների արդյունքում: «Որևէ բան ասել չեմ կարող, դրանք նախաքննական գաղտնիք են»,- ասաց նա:
