Թուրքական Zaman թերթի փոխանցմամբ, Գերմանիայի նախկին կանցլեր Գերհարդ Շրյոդերը Ստամբուլում անդրադարձ է կատարել ԵՄ-ին Թուրքիայի անդամակցությանը.
«Այսօր ԵՄ-ը քաղաքական և տնտեսական առումով վատթար վիճակում է: Եթե ԵՄ-ը շարունակի չընդունել Թուրքիայի անդամակցությունը, ապա առաջիկա 10 տարիներին նա կվերածվի «տնտեսապես հիվանդ» մարդու:
Վերջին 10 տարիներին Թուրքիայի տնտեսությունը վիթխարի թռիչք է գործել և այդ պլանում Թուրքիային արդեն կարելի է համեմատել BRIC-ի (Բրազիլիա, Ռուսաստան, Հնդկաստան և Չինաստան) երկրների հետ: Այժմ G-7-ը վերածվել է G-20-ի, որի կեսը զարգացող երկրներ են: Եվ եթե մենք քաղաքական ու տնտեսական առումով Եվրոպան համեմատենք այդ երկրների հետ, ապա կտեսնենք Եվրոպայի անզորությունը»:
Հիշեցնենք, որ 2010 թվականի հոկտեմբերի 22-ին անգլիական The Economist պարբերականում տպագրված ԵՄ-ին Թուրքիայի անդամակցության մասին հոդվածում Թուրքիան անվանված էր Եվրոպայի Չինաստան. «Սխալ են այն մեկնաբանությունները, թե ԵՄ-ը Թուրքիային չի ցանկանում տեսնել իր շարքերում, որովհետեւ այն իսլամական երկիր է: Նախկինում Թուրքիան Եվրոպայի հիվանդ մարդն էր, մինչդեռ այսօր նրա տնտեսությունը զարգանում է շատ արագ տեմպերով, ինֆլյացիան ցածր տոկոս է կազմում, թուրքական բանկերը մրցունակ են: Դրա համար էլ այն հնարավորություն ունի դառնալու ԵՄ-ի Չինաստանը»:
Իսկ նոյեմբերի 10-ին` Թուրքիայի վերաբերյալ ԵՄ-ի ընդլայնման 13-րդ զեկույցի հրապարակվելու հաջորդ օրը, Թուրքիայի նախագահ Աբդուլլահ Գյուլը հայտարարեց, որ այսօր ուժերի միջազգային տեղաբաշխումն իրականացվում է հօգուտ Արևելքի, եւ Թուրքիան իր տնտեսական բարեփոխումների շնորհիվ հնարավորություն կստանա միանալու BRIC-ի երկրներին:
