Հայաստանի ազգային հավաքականի գլխավոր մարզիչ Բերնար Շալանդն այսօր Ավանի ֆուտբոլի ակադեմիայում կայացած բաց մարզումից հետո պատասխանեց լրագրողների հարցերին.
«Ունենք 3 տարբեր հակառակորդներ: Էմիրաթների թիմը հրաշալի չէ, բայց լավ թիմ է և որակավորվել է Ասիայի գավաթի խաղարկությանը: Ալժիրի հավաքականը մասնակցելու է աշխարհի առաջնությանը, ինչը նշանակում է, որ շատ լավ թիմ է: Իսկ ինչ վերաբերում է Գերմանիայի հավաքականին, կարծում եմ, որ խաղալու ենք աշխարհի առաջիկա չեմպիոնի հետ:
Ցանկանում եմ գործի մեջ տեսնել հավաքականի բոլոր թեկնածուներին, այդ իսկ պատճառով այս 3 խաղերը շատ կարևոր են: Պետք է խաղայինք Իրաքի հավաքականի հետ այստեղ, բայց նրանք ասացին, որ չեն կարող գալ:
Աշխարհի առաջնությունը կարևոր է մասնագիտական տեսանկյունից, պետք է վերլուծել խաղերը: Որպես մարզիչ մենք պետք է սովորենք աշխարհի առաջնությունից: Կան հզոր հավաքականներ՝ Բրազիլիայի, Իսպանիայի, Իտալիայի, Գերմանիայի հավաքականները, իսկ Չիլիի հավաքականն, իմ կարծիքով, ստվերային ֆավորիտն է: Իհարկե, նաև Շվեյցարիայի հավաքկանաը (խմբ.- ժպտում է շվեյցարացի մասնագետը):
Ընտրել եմ այս խաղացողներին, հետևաբար վստահում եմ նրանց: Ընդհանուր առմամբ շատ լավ տպավորություն ունեմ մարզումից: Այո, Մխիթարյանը լավ տպավորություն է գործել ինձ վրա: Կարծում եմ՝ նրա համար հեշտ կլինի աշխատել ինձ հետ: Ես խենթ եմ, ինչպես Կլոպը: Շվեյցարիայում ասում են, որ ես Շվեյցարիայի Կլոպն եմ»:
