«Առաջին լրատվակա»-ի RealPolitik հաղորդաշարի հյուրն է Հայաստանի Ազգային ժողովի «Օրինաց երկիր» խմբակցության ղեկավար Հեղինե Բիշարյանը:
-Դուք արդեն մի քանի շաբաթ է, ինչ ընդդիմություն եք և հասարակությանը, մեր խնդիրներին, մեր դժվարություններին արդեն նայում եք այլ դիտանկյունից և այլ ճակատից: Դրանք ինչպե՞ս են Ձեզ ներկայանում: Այդ դժվարությունները, այդ իրական խնդիրները, որոնք, երբ իշխանություն չես, բոլորովին այլ պրիզմայով ես կարողանում տեսնել, շոշափել, զգալ: Դուք հասցրե՞լ եք արդեն հենց այդ պրիզմայով տեսնել:
-Անկեղծ ասած, որպես Ազգային ժողովի պատգամավոր` մենք, մեր խմբակցությունը գործել ենք մեր խղճի մտոք: Իշխանությունը շատ չի կաշկանդել մեզ, որ մենք չկարողանայինք այն խնդիրներին, որոնք ծառացած են մեր հանրության առջև, լուծումներ տալ: Աշխարհը գնացել է օրենսդրական ճանապարհով` օրենքներով երկիր կառուցելու:
«Օրինաց Երկիր» կուսակցության հիմնական նպատակներից մեկը եղել է այդ ճանապարհով խնդիրներին լուծումներ տալը: Եվ այդ տեսանկյունից մենք որտեղ տեսել ենք խնդիրներ, փորձել ենք օրենսդրական նախաձեռնություններով այդ խնդիրները տանել առաջ: Եվ եթե Դուք գիտեք, երբ մենք դուրս եկանք կոալիցիայից, մեր հիմնական պատճառներից մեկն այն էր, որ մենք ունեինք 35-ից ավելի օրենսդրական նախաձեռնություններ, և դրանք կյանքի չէին կոչվել: Եվ ահա դրանք շատանում են: Այսօր արդեն այդ նախաձեռնությունները 40-ից ավելի են: Մենք գտնում ենք, որ այս ճանապարհով պետք է լուծել խնդիրները, և այն տեսանկյունից, որ դրանք կյանքի չեն կոչվում, սա մեզ համար շատ դժվար և ծանր է: Մենք հիմա պետք է պարզապես որպես ընդդիմություն՝ շատ ավելի հետևողական լինել, շատ ավելի սուր շեշտադրումներ անել և ավելի շատ խոսել այն խնդիրների մասին, որոնք իսկապես այսօր ծառացած են մեր ժողովրդի առջև: Այն, որ խնդիրները շատ են, այն, որ այս տարիների ընթացքում մենք չենք կարողացել հասնել այնպիսի վիճակի, որ կարողանանք նվազեցնել…
-Ինչպե՞ս պետք է հասնեիք, պետք է անեիք: Դուք իշխանություն էիք և չէիք անում, դրա համար էլ խնդիրներն այսքան կուտակվել են…
-Ես պետք է ասեմ, որ իշխանության այս վեց տարիների ժամանակահատվածում քիչ օրենսդրական նախաձեռնություններ չեն, որ մենք կյանքի ենք կաչել, բայց դրանք բավարար չեն: Այո´, մենք մի փոքր մասով ներկայացված ենք եղել կառավարության…
-Բայց փոքր մասով չեք եղել, դուք կոալիցիա եք եղել և ամբողջությամբ պատասխանատու եք այն իրավիճակի համար, որում մենք հայտնվել ենք:
-Ես Ձեզ հետ մի բանում եմ համաձայն, որ մենք կոալիցիայի մեջ ենք եղել, բայց այն, որ մենք պետք է հավասարաչափ կրենք այդ բեռը, այդ դեպքում, երբ երկրում տեղի էր ունենում կառավարության փոփոխություն, ապա պետք է հավասարաչափ դիտվեր «Օրինաց Երկիր» կուսակցության` որպես կոալիցիայի անդամ: Այն, որ մեզ ի սկզբանե չեն դիտել որպես կոալիցիայի լիարժեք անդամ, որովհետև մենք առաջարկություն արեցինք, և կառավարությանը փոխվեց…
-Այսինքն՝ այդ պահից զգացիք անլիարժեքության…
-Չէ, մենք գիտեինք, որ մենք մաս ենք կազմել կոալիցիայի, ունենք մեր փոքրիկ պատասխանատվությունը՝ մեր փոքրիկ մասով: Եթե երկրում 11 պորտֆել կա, 3-ն են մերը, մենք մեր մասով ենք պատասխանատու: Այն նախարարությունները, որոնք եղել են մերը, մենք ուշադիր ենք, մենք այդ նախարարությունների կտրվածքով էլ փորձել ենք ունենալ լավագույն վիճակը: Գյուղատնտեսության նախարարությունը, տեսեք, ունեցել է աճ, քան մյուս նախարարությունները, արտակարգ իրավիճակների նախարարություն ենք կայացրել, որը չի եղել այս տարիների ընթացքում, իսկ այսօր չի զիջում՝ հանրությանը ծառայելով բոլոր ուղղություններով, բոլոր գործիքները կիրառում է, և այսօր հանրությունը տեսավ, թե ինչպիսի աջակցություն է ստանում նա արտակարգ իրավիճակների նախարարությունից, երբ ինքը հայտնվում է որևէ արտակարգ դրության մեջ: Ես պետք է ասեմ, որ այս մասով մենք հետևողականորեն փորձել ենք անել այն, ինչ գտել ենք, որ պետք է և անհրաժեշտ է:
Դիտեք հարցազրույցն ամբողջությամբ տեսանյութում:
