Պատասխանելով Գագիկ Ծառուկյանի և Լեւոն Տեր-Պետրոսյանի հանդիպման մասին հարցին՝ նորանշանակ վարչապետ Հովիկ Աբրահամյանը ասել էր, որ ցանկացած հանդիպում ունի և դրական, և բացասական կողմեր: Իսկ հարցին, թե արդյոք իր դեմ չէր ուղղված հանդիպումը, Հովիկ Աբրահամյանը պատասխանել է, որ կարևորը ինքն իր դեմ չլինի, իր դեմ փաստեր չլինեն, ինքն իր գործը լավ անի:
Խորհրդարանում իր կառավարության ծրագրի հաստատմանը սպասող Հովիկ Աբրահամյանը ըստ էության հետաքրքիր կոնտեքստով է խոսել: Ինչը կարող է դրական լինել Տեր-Պետրոսյանի ու Ծառուկյանի հանդիպման մեջ Հովիկ Աբրահամյանի համար, և ինչը՝ բացասական: Դրական կարող է լինել այն, որ Տեր-Պետրոսյանն ու Ծառուկյանը, ըստ էության, անպտուղ հանդիպումներ են ունենում, ինչը Հովիկ Աբրահամյանը Սերժ Սարգսյանի մոտ կարող է գրանցել, այսպես ասած, իր ակտիվին: Սրան զուգահեռ, դրական կարող է լինել և այն, որ Հովիկ Աբրահամյանը Տեր-Պետրոսյան-Ծառուկյան հանդիպումների ֆոնին Սերժ Սարգսյանի մոտ էլ ավելի կարող է բարձրացնել սեփական նշանակությունը: Բացառել պետք չէ, որ դրական էլի բաներ կարող է գտնել վարչապետը: Այժմ բացասականի հնարավոր տարբերակի կամ տարբերակների մասին:
Հովիկ Աբրահամյանի համար բացասական կարող է լինել այն, որ ԲՀԿ-ն, ըստ էության վերահսկողության տակ պահելով ՀԱԿ-ին, նրա միջոցով կարող է պարբերաբար «թունավորել» Հովիկ Աբրահամյանի կյանքը, ինչի մեսիջը կառավարության ծրագրի խորհրդարանական քննարկումներում Աբրահամյանին տրված ՀԱԿ-ի հարցերն էին, որոնք կոնկրետ ոչինչ չէին պարունակում իհարկե, սակայն ազդակ էին, որ ՀԱԿ-ը կարող է Հովիկ Աբրահամյանի համար ոչ դուրեկան, անհարմար դիրքորոշումներ որդեգրել: Իսկ սա, առանց ԲՀԿ-ի հետ համաձայնեցման, գրեթե անհնար է:
Եվ ուրեմն այս տեսանկյունից Ծառուկյան-Տեր-Պետրոսյան տանդեմը Հովիկ Աբրահամյանին կարող է ստիպել անընդհատ լարված մնալ ու ինչ-որ բան սպասել: Եվ այս դրականի ու բացասականի հարաբերականությամբ հանդերձ, Հովիկ Աբրահամյանը ուզում է ցույց տալ, որ գտել է ելքը, այսինքն՝ պաշտպանության լավագույն բանալին, քանի որ, ըստ էության, լիակատար կերպով վերահսկել Ծառուկյան-Տեր-Պետրոսյան տանդեմին, ու հատկապես այդ տանդեմում Ռոբերտ Քոչարյանի բաղադրությունը, նրա համար անհնար է: Այդ իսկ պատճառով Հովիկ Աբրահամյանը հնչեցնում է բանաձևը, այդ թվում և Սերժ Սարգսյանի համար, որ՝ ինձ ինչ էլ ասեն, իմ մասին ինչ էլ ասեն, ինչ էլ խորհուրդ տան կամ առաջարկեն, միեւնույն է, հավատալ պետք է միայն փաստերին: Այսինքն, Հովիկ Աբրահամյանը Սերժ Սարգսյանին ուղղակիորեն ասում է, որ կարող է իր մասին լսել շատ ու շատ բաներ, կասկածներ, բամբասանքներ և այլն, բայց եթե չկան փաստեր, ապա չպետք է տուրք տալ դրանցից որեւէ մեկին: Միայն պետք է հասկանալ, դա Սերժ Սարգսյանի ու Հովիկ Աբրահամյանի միջև պայման է, այսինքն՝ առաջնորդվել միայն փաստերով, թե Աբրահամյանն արդեն իսկ խնդիրներ ունի իր վարքագծի կապակցությամբ ու նաև ստիպված է եղել նախօրեին պատասխանել Սերժ Սարգսյանի հարցերին՝ Ծառուկյան-Տեր-Պետրոսյան հանդիպման կապակցությամբ:
