Ըստ հայաստանյան լրատվամիջոցների` 2011 թ. մարտի 13-ին անհայտ անձանց կողմից առևանգվել, այնուհետև ձերբակալվել, իսկ այսօր երկու ամսով կալանավորվել է Հայ Ազգային Կոնգրեսի ակտիվիստ, անվանի բռնցքամարտիկ Սամսոն Խաչատրյանը:
Սամսոն Խաչատրյանին ձերբակալել են այս տարվա մարտի 1-ին Հայ ազգային կոնգրեսի հանրահավաքի ժամանակ քաղաքացիական հագուստով ոստիկանների հետ վիճաբանության մեջ մտնելու առնչությամբ։
Նախնական տվյալների համաձայն` արդեն իսկ ակնհայտ է, որ իշխանությունների կողմից իրականացվում է քաղաքական հետապնդում: Որևէ նորմալ երկրում մարդուն ոչ թե առևանգում, այլ հրավիրում են ոստիկանություն այս կամ այն խնդրի վերաբերյալ բացատրություն ստանալու ակնկալիքով: Քաղաքացու նկատմամբ կիրառում են կալանավորումը որպես խափանման միջոց, եթե տեղեկություններ ունեն, որ նա կարող է խուսափել կամ խանգարել անաչառ քննությանը, այլ ոչ թե կիրառում են կալանքը որպես խափանման միջոց, որովհետև այդպես է կարծում քննություն իրականացնող լիազոր մարմնի ներկայացուցիչը: Ակնհայտ է, որ Սամսոն Խաչատրյանին կալանավորելով` ռեժիմը սկսում է նրան պատժելու գործընթացը, ինչը օրենքով արգելված է, քանզի Սամսոն Խաչատրյանը դատարանի կողմից հանցագործ ճանաչված չէ:
Պահանջում ենք անմիջապես ազատ արձակել Սամսոն Խաչատրյանին և անցկացնել հրապարակային քննություն բոլոր շահագրգիռ կողմերի մասնակցությամբ:
«Հայ քաղաքացիական հասարակություն»
Մարդու իրավունքների պաշտպանության ընկերակցություն