Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Լևոն Ավետիսյանի նախագահությամբ շարունակվեց Վոլոդյա Ավետիսյանի գործի դատական քննությունը:
Վոլոդյա Ավետիսյանի մուտքը դատարանի դահլիճ , ինչպես միշտ, դիմավորեցին հոտնկայս և բուռն ծափահարություններով:
Դահլիճ էր բերվել պաստառ՝ «Հանցագործ ռեժիմի արքա» մակագրությամբ և հանրապետության նախագահի նկարով:
Նախագահողը պաստառը հեռացնել տվեց:
Նախագահողը կարգապահություն հաստատելու վրա մի քանի րոպե ծախսեց:
Ապա հիշեցրեց, թե հրապարակվելու է վկա Հենրիկ Հ.-ի նախաքննական ցուցմունքը, ով անցած նիստերից մեկում հայտարարել էր, թե ոչինչ չի հիշում: Այդ նիստից հետո վկան հեռացել է հանրապետությունից:
Արա Զաքարյանն առարկեց Հենրիկ Հ.-ի ցուցմունքի հրապարակման դեմ՝ ասելով, թե վկան դատարանում չէ, հրապարակումից հետո նրան հարցեր տալ հնարավոր չէ, հետևաբար օրինական չի լինի նրա ցուցմունքը հրապարակելը:
Հանրապետությունից բացակայող մյուս վկաների ցուցմունքների հրապարակման դեմ պաշտպանը նույնպես առարկեց:
Նախագահողը ներկայացրեց, որ վկայի ցուցմունքը հրապարակվում է, եթե անհնար է ապահովել այդ վկայի ներկայությունը դատարանում:
Հենրիկ Հ.-ն դատարան ներկայացել է, հայտարարել, թե չի հիշում նախաքննական ցուցմունքը, չգիտի՝ դա ով է տվել:
Դատարանի աշխատակիցները ջանքեր են գործադրում մի քանի վկայի ներկայությունը ապահովելու համար, բայց մի քանի վկաներ Հայաստանից բացակայում են:
Նման պայմաններում դատարանի կողմից ձեռնարկվել են օրենքով նախատեսված բոլոր միջոցները վկաների ներկայությունն ապահովելու համար, բայց նրանք այնպիսի պատճառներով են բացակայում, որ բացառվում է նրանց ներկայությունը դատարանում ապահովելը:
Դատարանը որոշեց, որ պաշտպանի միջնորդությունը չի համապատասխանում ստեղծված պայմաններին, հետևաբար որոշվեց հրապարակել Հենրիկի ու հանրապետությունից բացակայող մի քանի վկաների ցուցմունքները:
Հենրիկ Հ.-ն Գյումրիում է սովորել, ունի քանդակագործի մասնագիտություն:
Ընտանիքի հետ մեկնել է Ռուսաստան: Եկել է Հայաստան՝ զինծառայության հարցը կարգավորելու համար:
Ըստ վկայի՝ իր պապը հանդիպել է մի անձնավորության հետ, ով պիտի իրեն զինծառայությունից ազատեր հինգ հազար դոլարով:
Ինքը պապի հետ գնացել է Վոլոդյա անունով անձնավորության հետ հանդիպելու…
Դահլիճում միջադեպ տեղի ունեցավ, քանի որ ներկա մի տիկին հայտարարեց, թե հրապարակվում է հոգեկան հիվանդի ցուցմունքը: Կինը ասաց, թե իր կարծիքն է հայտնում ընդամենը:
Նախագահողը որոշեց տիկնոջը հեռացնել դատարանի դահլիճից: Մի քանի րոպե նախագահողի որոշումը ի կատար չէր ածվում: Վերջապես նախագահողը հորդորեց. «Գնացեք, մի տասնհինգ րոպե հանգստացեք, եթե համարեք, որ էլ չեք խանգարի, ներս կգաք»:
Կինը մի կերպ հեռացավ դահլիճից:
Վոլոդյա Ավետիսյանի շահերի պաշտպան Արա Զաքարյանը վկայի ցուցմունքի հրապարակումից հետո նշեց, որ վկան ինքը դատարանում հայտարարել է, թե ոչինչ չի հիշում, նույն վկան հոգեկան հիվանդության խնդիրներ ունի և ժամանակավորապես ազատվել է զինծառայությունից, բացի այդ, դատարանը մեծ ցանկության դեպքում կարող էր ապահովել այս վկայի ներկայությունը, ինչպես ապահովեց նրա պապի ներկայությունը:
Վկա Օսաննայի ցուցմունքը հրապարակվեց: Վկա Հենրիկի մորաքույրն է: Նախաքննական ցուցմունքում հայտնել է, թե հայրը հանդիպել է Վոլոդյա Ավետիսյանի հետ, որ Հենրիկը կամ ազատվի զինծառայությունից կամ բնակավայրին մոտ տեղ ծառայի առողջական խնդիրների պատճառով: Օսաննան ասել է, որ Վոլոդյա Ավետիսյանը ինչ-որ գումար է պահանջել իր հորից, բայց հայրը իրենց ոչինչ չի ասել: Հետո հայրը հանդիպել է Վոլոդյա Ավետիսյանին ու երկու հազար դոլար է տվել:
Վկան ասել է, թե Վոլոդյա Ավետիսյանը նաև Գյումրի է գնացել, հանդիպել իր հոր հետ: Հետո վկան իմացել է, որ Ավետիսյանը ձերբակալվել է:
«Էրկուսով նստեք ու կարդացեք»,- հայտարարեց ներկաներից մեկը՝ նկատի ունենալով, որ վկաների ցուցմունքները հրապարակում էր մեղադրողը:
Նախագահողը նկատողություն արեց՝ դիմելով՝ քաղաքացի՛: «Ես քաղաքացի չեմ, կալանավոր եմ»,- ասաց տղամարդը: Նախագահողը փորձեց նրան դուրս հրավիրել, բայց հետո հրաժարվեց այդ մտքից, քանի որ մարդը չենթարկվեց նախագահողին:
Դատարան վերադարձավ տասնհինգ րոպեով հեռացված տիկինը: «Միևնույնն է՝ մի քանի րոպեից նորից դուրս եք գալու»,- փորձեց կատակել նախագահողը՝ միգուցե դահլիճի համակրանքը փոքր-ինչ շահելու համար: «Դուք էլ էնպես արեք, որ դուրս չգամ, սիրելի դատավոր ջան»,- իր հերթին կատակեց Սուսաննա անունով տիկինը:
Հաջորդ վկան՝ Վարդանը զինծառայող է, ում ցուցմունքը հրապարակեց մեղադրողը, հայտնել է, որ Վոլոդյա Ավետիսյանի հետ ընկերական հարաբերությունների մեջ է եղել:
Վոլոդյա Ավետիսյանը դիմել է նրան՝ ընկերոջ երեխային զինծառայությունից ազատվելու հարցով՝ ասելով, թե երեխան առողջական խնդիրներ ունի:
Վկան ասել է, թե հասկացել է, որ Ավետիսյանն անօրինական բան է ցանկանում անել, բայց չի էլ ցանկացել մերժել նրան, որ չմտածի՝ թոշակի է անցել, արդեն հին ծանոթները մերժում են: Խոստացել է դիմել համապատասխան մարդկանց, բայց իրականում ոչ մեկին չի դիմել:
Հետո ասել է, թե ում ցանկացել է դիմել, Հայաստանում չէ: Ավետիսյանն ասել է, թե իր հեռախոսը հնարավոր է՝ լսվում է, ուրիշ համար է տվել, ասել՝ կոդերով խոսենք, որ լսողները չհասկանան: Ավետիսյանն ասել է, որ երեխան եկել է Հայաստան: Վկան էլ ասել է, թե անհրաժեշտ մարդը Հայաստանում չէ, անձանց անվանել են «հողագործ», ասել են «սփխեչին» կգա Հայաստան:
Վկան ձևացրել է, թե դիմելու է ինչ-որ մեկին, բայց չի դիմել: Հետո Վոլոդյային ասել է՝ գնացել է անհրաժեշտ մարդու մոտ, նա հրաժարվել է այդ հարցով զբաղվելուց;
Վկան ասել է, որ Վոլոդյա Ավետիսյանն իրեն գումար չի առաջարկել, ինքը հնարավորություն չունի որևէ մեկին զինծառայությունից ազատելու, ինքը որևէ մեկին նման հարցով չի դիմել:
Հաջորդ վկան՝ Ծովինարը, ասել է, թե Վոլոդյա Ավետիսյանն իր մորեղբորորդին է:
Նրա ընկերուհու որդին զորակոչվել է բանակ, Արցախում պիտի ծառայեր: Ընկերուհին դժգոհել է, ասել, թե որդին ծրագրավորող է, լավ կլիներ, որ ծառայեր ըստ մասնագիտության:
Ծովինարն ընկերուհուն ցանկացել է օգնել, ասել է՝ մորեղբորս որդին գնդապետ է, Ազատության հրապարակում ցույցեր է անում, կապեր ունի, կարող է օգնել: Դիմել է Վոլոդյային, նա ասել է՝ խոսել է ինչ-որ մեկի հետ, կարող են տղային համակարգչային օպերատոր նշանակել հինգ հարյուր դոլարով:
Վկան ընկերուհուն է փոխանցել Վոլոդյայի համարը: Ընկերուհին ասել է, թե որդուն ցանկանում են այլ զորամաս տեղափոխել, Վոլոդյան իրենց օգնել չի կարող: Վկան ասել է, թե ընկերուհին Վոլոդյային գումար չի տվել: Ըստ Ծովինարի՝ իր եղբայր Վոլոդյան ազնիվ, ազգասեր մարդ է, խնդրել է նրա նկատմամբ… մեղմ վարվել:
Վկաների հարցաքննությունը դատարանը համարեց ավարտված:
Նախագահողն ասաց, թե ըստ կարգի՝ պետք է անցնեն գործում առկա մյուս ապացույցների հետազոտմանը:
Վոլոդյա Ավետիսյանի շահերի պաշտպան Արա Զաքարյանը միջնորդություն արեց. մեղադրվող յուրաքանչյուր անձ իրավունք ունի հարցաքննելու իր դեմ ցուցմունք տված անձանց: Դատարանում կարող է հրապարակվել վկայի ցուցմունքը, եթե պաշտպանական կողմը գոնե նախաքննական փուլում հնարավորություն է ունեցել այդ վկային հարցեր տալու:
Վկաներ Հենրիկին, Օսաննային, Վարդանին, Ծովինարին պաշտպանական կողմը հարցեր տալու հնարավորություն չի ունեցել: Պաշտպանը միջնորդեց այդ վկաների ցուցմունքները ճանաչել անթույլատրելի ապացույց: Ամբաստանյալը միացավ պաշտպանին: Դահլիճը հայտարարեց, որ նույնպես միանում է պաշտպանի միջնորդությանը:
Մեղադրողն ասաց, որ վկա Վարդանին հարցեր տալու հնարավորություն ունեցել է պաշտպանը, նաև՝ վկա Հենրիկին, ով դատարան էր եկել: Ծովինարը ամբաստանյալի բարեկամն է, ամբաստանյալի հարազատները կարող են այնպես անել, որ նա ներկայանա դատարան: Օսաննայի ներկայությունն ապահովել հնարավոր չի եղել: Այսպիսով՝ մեղադրողի կարծիքով՝ պաշտպանի միջնորդությունը ենթակա էր մերժման:
Պաշտպանը հայտարարեց, թե վկա Վարդանին պատշաճ հարցաքննելու հնարավորություն չի ունեցել, քանի որ պաշտպանական կողմին տրամադրված չեն եղել այդ անձի հայտնած դիրքորոշումները, քննչական գործողությունների ընթացքում նրա հայտնածները:
Վկա Հենրիկը դատարանում էր, բայց նրա նախաքննական ցուցմունքը հրապարակված չէր, պաշտպանը չէր կարող չհրապարակված ցուցմունքի վերաբերյալ հարցեր տալ:
Ծովինարի վերաբերյալ մեղադրողի ասածը ցնցող փաստարկ անվանեց պաշտպանը:
Եթե մեղադրանքի կողմը ցանկանա, կապահովի վկաների ներկայությունը, ինչպես ապահովեց Հենրիկի պապի ներկայությունը, ով ասաց, որ ներկայացել է, որպեսզի թոռը խնդիրներ չունենա՝ ասաց պաշտպանը:
Արա Զաքարյանը հայտարարեց. «Եթե մերժեք միջնորդությունը, անդրադարձեք Եվրոպական կոնվենցիային, ՀՀ Սահմանադրությանը, ծանրակշիռ հիմնավորումներ բերեք, թե ինչու դրանք կիրառելի չեն…»:
Ապա դահլիճում ամեն բան խառնվեց: Հասկանալի չէր՝ ինչ է անում նախագահողը՝ որոշում կայացնելո՞ւ է պաշտպանի միջնորդության վերաբերյալ, թե՞ արդեն հետաձգում է նիստը:
Ի պատասխան նախագահողի՝ պաշտպանը հայտարարեց, որ Վոլոդյա Ավետիսյանի կոչով չի պայմանավորված դահլիճում ներկաների պահվածքը: «Մարդիկ տեսնում են, որ արդար դատաքննություն չի կատարվում, դրա համար էլ վրդովվում են»,- ասաց պաշտպանը:
Դատական դահլիճում ներկաները գոչյուններով իրենց համաձայնությունը արտահայտեցին, կատարվողը «բեմադրություն» անվանեցին, ռեժիմը՝ հանցագործ:
Ամոթանք տվեցին մեղադրողին, լուտանքներ հնչեցրեցին նրա ու դատարանի հասցեին, որ Վոլոդյա Ավետիսյանի նման մարդուն նստեցրել են ամբաստանյալի աթոռին:
Դատական նիստը հետաձգվեց մինչև մայիսի 23-ը: Պետք է ենթադրել, որ հաջորդ նիստին դատարանը կհրապարակի իր որոշումը պաշտպանի միջնորդության վերաբերյալ:
