Արտաքին հարաբերությունների մշտական հանձնաժողովի անդամ, իշխող հանրապետական կուսակցությունից պատգամավոր Համլետ Հարությունյանը «էն գլխից» էլ գիտեր, որ եթե Հայաստանը փորձի դառնալ ցանկացած միության անդամ, Ղարաբաղի հարցը անպայման խոչընդոտներ է առաջացնելու Հայաստանի համար:
Նա նման կարծիք հայտնեց «Առաջին լրատվական»-ի հետ զրույցում․ «Եթե մենք ուզենանք դառնալ որևէ միության անդամ՝ Մաքսային միություն լինի, թե Եվրամիություն, Ղարաբաղը խոչընդոտ է լինելու:
Ես այսօր ինֆորմացիա ստացա, որ ադրբեջանցիները տապալել են Մոսկվայում Ղարաբաղի երգչախմբի համերգը: Ադրբեջանի դեսպանը նոտայի մակարդակով դիմել է Մոսկվային, որ եթե այդ համերգը կայանա՝ դա բացասաբար կանդրադառնա ռուս-ադրբեջանական հարաբերությունների վրա: Այդ խոչընդոտները որ հարուցում են՝ ինձ համար շատ վաղուց հայտնի էր: Հիմա Մաքսային միության անդամ Ղազախստանը դա անում է Ադրբեջանի միջոցով»:
Մեր այն հարցին, թե կարո՞ղ է խոչընդոտը լինել այն աստիճանի լուրջ, որ Հայաստանը չանդամագրվի ՄՄ-ին, պատգամավորն ասաց․ «Շատ հնարավոր է։ Հայաստանը լրիվ անկախ պետություն է և ինքնուրույն քաղաքականություն է վարում: Եթե Հայաստանի համար այնպիսի անելանելի վիճակ ստեղծեն, մենք չենք մտնի»:
Անելանելի վիճակ կարելի է համարել Արցախի և Հայաստանի միջև անցկակետ դնե՞լը՝ հարցին ի պատասխան Հ․ Հարությունյանն ասաց․ «Ղարաբաղի հետ, կարծում եմ, ճիշտ չի լինի անցակետ դնելը»,- եզրափակեց նա։
Մանրամասները՝ մեր տեսանյութում։