Այս գիշեր «Ֆուկուսիմա-1» ատոմակայանում կրկին հրդեհ է բռնկվել: Չորրորդ ռեակտորի վրա կրակի և ծուխ է երևացել: Ինչպես հաղորդել է Kyodo գործակալությունը, չնայած վարչապետի հրահանգին՝ մնալ ատոմակայանում և զբաղվել վթարի հետևանքների վերացմամբ հենց տեղում, ատոմակայանը կառավարող Tokyo Electric Power (TEPCO) ընկերությունը որոշում է կայացրել տարհանել ատոմակայանի ողջ անձնակազմը, քանի որ ճառագայթման մակարդակն անչափ բարձր է եղել, և այլևս հնարավորություն չի եղել որևէ աշխատանք իրականացնել:
Այս մասին հաղորդել է կառավարության գլխավոր քարտուղար Յուկիո Էդանոն: Նա չի բացառել, որ ատոմակայաններում վթարների հետևանքների վերացման գործում ներգրավվեն նաև ամերիկացի զինվորականները: Այս մասին հաղորդում է Franec Presse գործակալությունը:
TEPCO ընկերությունում նաև հայտնել են, որ վնասվել են առաջին ռեակտորի միջուկների 70%-ը, իսկ երկրորդի` 33%-ը: Նրանք չեն բացառել, որ հնարավոր է մոտ ժամերին իրավիճակը ատոմակայանում կրիտիկական դառնա: Իրավիճակը փրկելու համար հնարավոր է՝ սկսեն ռեակտորների վրա բորաթթու լցնել, որպեսզի կանխվի ռադիոակտիվ նյութերի մեծ քանակի արտանետումը մթնոլորտ և դադարեցվեն հետագա ռեակցիաները:
