Այսօր կմեկնարկի Գորիսի քաղաքապետի ընտրությունների քարոզարշավը, որը կընթանա ոչ լարված մթնոլորտում՝ ինչպես նախատեսվում էր: Սյունիքի նախկին մարզպետ Սուրիկ Խաչատրյանի՝ Լիսկայի թեկնածուն՝ Վաչագան Ադունցը, ընտրապայքարում մնաց առանց իր հիմնական մրցակիցների՝ Արա Բուդաղյանի և Տիգրան Կարապետյանի, ով համարվում էր Սյունիքի գործող մարզպետի թեկնածուն:
Այսօր վաղ առավոտյան նախ ինքնաբացարկ հայտնեց Արա Բուդաղյանը, իսկ ավելի ուշ՝ Տիգրան Կարապետյանը: Ըստ շրջանառվող տեղեկությունների՝ նրանց նկատմամբ ամենաբարձր մակարդակով կիրառվել են ճնշումներ և նրանցից պահանջվել է հանել թեկնածությունը հօգուտ Ադունցի: Մինչդեռ ընդամենը մեկ օր առաջ Տիգրան Կարապետյանն ասել էր, որ «որևէ մեկը կամ ցանկացած տիպի ճնշում չի կարող ազդել իր վրա՝ հրաժարվելու համար ընտրապայքարից: Սա իր պայքարը չէ: Ինքն առաջադրվել է նաև գորիսեցիների, համայնքի պահանջով և պայքարելու է միմիայն հաղթանակի համար»:
Այս պահին ընտրապայքարում մնացել են Վաչագան Ադունցը և ավագանու անդամ Հրայր Յոլյանը: Ըստ շրջանառվող տեղեկությունների՝ Յոլյանը ևս հանելու է իր թեկնածությունը՝ ընտրապայքարում Սուրիկ Խաչատրյանի թեկնածուին թողնելով միայնակ: Իսկ եթե չհանի էլ, ապա, գորիսեցիների խոսքով, միևնույն է՝ նա նախ համարվում է «պրոլիսկայական» և հետո՝ ձևական թեկնածու:
Յոլյանը «Առաջին լրատվական»-ի հետ զրույցում ասաց, որ չի պատրաստվում հանել իր թեկնածությունը, և իր մասին շրջանառվող տեղեկությունները «սխալ են»:
– Սխալ ինֆորմացիա ունեք, ինչի՞ պետք ա հանեմ թեկնածությունս: Էս վերջին դեպքերից հետո շատ լուրեր են պտտվում, որոնք անհիմն են:
– Պարոն Յոլյան, Ձեր մյուս երկու մրցակիցներն այսօր ինքնաբացարկ են հայտնել: Խոսվում է նրանց նկատմամբ կիրառված ճնշումների մասին: Ինչպե՞ս եք գնահատում այդ ամենը:
– Չեմ կարող ասել: Ես ոչ ոքի հետ չեմ հանդիպել, նման հարցեր չեմ քննարկել և ոչ մի կարծիք չունեմ այդ ամենի հետ կապված: Ես իմ թիմով աշխատում եմ, աշխատանքի մեջ ենք:
– Իսկ Ձեր շանսերն ինչպե՞ս եք գնահատում՝ այն դեպքում, երբ Ձեզ համարում են ձևական թեկնածու, իսկ Ձեր մրցակիցը Սուրիկ Խաչատրյանի թեկնածուն է:
– Ես առաջին պահին եմ ասել՝ ցանկացած թեկնածու թեկնածու է: Ամեն մեկն ուժ ունի իր չափով: Ընտրությունները ցույց կտան: Ես չեմ ուզում որևէ մեկին վարկաբեկել կամ ինչ-որ մեկին մի վատ բան ասել: Ես այդպիսի տրամադրվածություն չունեմ:
– Այսինքն՝ բացառո՞ւմ եք, որ բացարկ կհայտնեք հօգուտ Ադունցի: Հնարավո՞ր է, որ Ձեր նկատմամբ էլ ճնշումներ լինեն:
– Ոչ, մենք ոչ մեկից ոչ վախենում ենք, ոչ էլ վախցնում: Տենց բան հնարավոր չի: Ես բացառում եմ, որ ճնշումների անվան տակ կհանեմ թեկնածությունս:
Հ.Գ.- Արա Բուդաղյանի և Տիգրան Կարապետյանի ինքնաբացարկից հետո Գորիսում ահավոր հիասթափություն է տիրում: Գորիսեցիների խոսքով՝ իրենց այլ բան չի մնում, քան բոյկոտել և չգնալ ընտրությունների: «Ինչ արած, ամենաբարձր մակարդակով ճնշեցին և ստիպեցին հանել թեկնածությունը: Բայց գորիսեցիները չեն գնալու ընտրության: Ադունցին ոչ ոք ձայն չի տա: Եթե նրա կողքին Լիսկան է կանգնած, նրա հեղինակությունը զրոյական է: Ոչ մի գորիսեցի նրան ձայն չի տա»,- վստահաբար պնդեցին գորիսեցիները: