Ազգային ժողովում այսօր քննարկվում էր Հայ Յեղափոխական Դաշնակցության ներկայացրած՝ 100 տոկոսանոց համամասնական ընտրակարգին անցնելու օրենքի նախագիծը, որին կտրուկ դեմ արտահայտվեց իշխող Հանրապետական կուսակցությունը:
«Առաջին լրատվական»-ի հետ զրույցում ՀՀԿ-ական պատգամավոր Արմեն Կարապետյանն ասաց, որ անհրաժեշտ են և՛ համամասնական, և՛ մեծամասնական ընտրություններ: Նրա խոսքերով՝ մեծամասնական համակարգը հնարավորություն է տալիս ընտրել իր պատգամավորին․ «Կան մարդիկ, որ այդ կուսակցության քաղաքականությունը չեն ընդունում, բայց մեծամասնականի դեպքում իրենց պատգամավորին են ընտրում»:
Մեր այն դիտարկմանը, թե, միևնույն է, այդ պատգամավորը գալիս է խորհրդարան և քվեարկում այնպես, ինչպես իր կուսակցությունն է որոշում, Արմեն Կարապետյանն արձագանքեց․ «Չէի ասի, թե մեծամասնականով ընտրված պատգամավորն այդ կարգի է, նրանք իրենց սկզբունքներն ունեն ու ներկայացնում են իրենց ընտրողների շահերը»,- ասաց նա:
Մենք խնդրեցինք հիշեցնել գեթ մեկ դեպք, երբ մեծամասնական ընտրական կարգով ընտրված պատգամավորը խմբակցության որոշումից դուրս քվեարկություն է կատարել։ «Շատ ժամանակ է այդպես լինում, երբ մեծամասնական ընտրված պատգամավորը իր սկզբունքներով, իր ընտրողների շահերն է պաշտպանում և ոչ թե կուսակցության»,- ասաց նա:
Հարցին՝ չի՞ կարծում, որ մեծամասնականով առաջադրվում են օլիգարխներ, որոնք իրենց բիզնեսները պաշտպանելու համար են խորհրդարան գալիս, Արմեն Կարապետյանը պատասխանեց․ «Ես համաձայն չեմ, տվյալ թաղամասում մեկը հեղինակություն ունի, կարողանում է վայելել տվյալ թաղամասի, տվյալ գյուղի հեղինակությունը և պատգամավոր դառնում: Մեծամասնականով ընտրված պատգամավորը անմիջապես կապ է ունենում ընտրողի հետ, իսկ համամասնականը՝ ոչ, բնակչության մեծ մասն իր պատգամավորի հետ կապ չի ունենում»:
Այդ դեպքում Սամվել Ալեքսանյանն, օրինակ, ինչո՞ւ է Ազգային ժողում, երբ օրենսդրական գործունեություն չի ծավալում, առանձնապես ակտիվ հարցադրումներ չի անում․«Ես չեմ կարող ասել այդ մասին, բայց կարծում եմ՝ իր կարգով , իր ձևով մասնակցում է բոլոր օրենքներին»,-եզրափակեց նա:
Մանրամասները՝ տեսանյութում