Մի քանի օր է արդեն` լրատվամիջոցներում, և ոչ միայն, ակտիվորեն քննարկվում է քրեական հեղինակությունների հերթական «ռազբորկան» և դրա արդյունքում առաջացած աժիոտաժը:
Այդ հրապարակումների համաձայն` Օշականցի Գևորիկը վիճաբանություն է ունեցել քրեական աշխարհում հայտնի հեղինակություն Երրորդմասցի Լյովիկի հետ, որի արդյունքում Օշականցի Գևորիկը ծեծի է ենթարկվել Լյովիկի կողմնակիցների կողմից, որը համարվում է ոչ պատվաբեր այդ աշխարհի ներկայացուցիչների համար: Հետևաբար` տեղի ունեցածը չի կարող անպատասխան կամ անհետևանք մնալ:
Հերթական «ռազբորկան» կանխելու համար քրեական աշխարհի ներկայացուցիչներին «շատ բարձր մակարդակով» ասվել է, որ հեռանան Հայաստանից, այլապես դա կարող է ավելի վատ հետևանք ունենալ նրանց համար: Օշականցի Գևորիկին ծեծի ենթարկողները արդեն իսկ Հայաստանում չեն, իսկ այդ «ռազբորկային» մասնակից մյուս անձինք՝ «Զապ» մականունով Անդրանիկ Սողոյանը, Զապի քրոջ որդին և Օշականցի Գևորիկը փորձել են հեռանալ Ռուսաստան, սակայն բավական անհարմար վիճակում են հայտնվել: Նրանց թույլ չեն տվել հատել ռուս-վրացական սահմանի Վերին Լարսի անցակետը:
Նշենք, որ Լարսի անցակետից նրանք հետ են վերադարձվել ոչ թե իրավապահների միջամտության, այլ միգրացիոն վերջին փոփոխությունների և խստացումների արդյունքում: Քրեական աշխարհի ներկայացուցիչները բախվել են այն խնդրին, որին մի քանի ամիս է բախվում են ՌԴ մեկնող հայ միգրանտները:
Սա ևս խոսում է այն մասին, որ քրեական աշխարհի այս ներկայացուցիչներն այլևս չունեն նախկին ազդեցությունը:
