«Առաջին լրատվական»-ի զրուցակիցն է ՀՀԿ խմբակցության պատգամավոր Մանվել Բադեյանը:
– Պարոն Բադեյան, Հովիկ Աբրահամյանը գործարարների հետ հանդիպման ժամանակ հայտարարել է, որ այսուհետ բոլորը պետք է գործեն նոր խաղի կանոններով՝ հավասար դաշտում: Հավատո՞ւմ եք, որ մեր երկրում նման իրավիճակ կստեղծվի:
– Իհարկե, դրական եմ գնահատում, որովհետև տնտեսական ոլորտում պետության հիմնական խնդիրը բոլոր տնտեսվարողների համար հավասար մրցակցային պայմաններ ապահովելն է: Այնպես որ, միայն դրական կարելի է գնահատել կառավարության այդ մտադրությունը: Նաև վստահություն է ներշնչում, թե ով է դա ասում: Խոսքեր էլի լսել ենք, բայց սա ասում է մի կառավարություն, որի ղեկավարն ինքն է անցել երկար տնտեսական զարգացման ճանապարհ:
– Կառավարություն, որի ղեկավարը նաև խոշոր սեփականատեր է:
– Այո:
– Եվ կարծիք կա, որ նրա բիզնեսը գործում է հարկային դաշտից դուրս:
– Ես երբեք հարկային աշխատակից չեմ եղել: Եվ որևէ մեկին էլ խորհուրդ չէի տա այդպիսի հայտարարություններ անել, եթե ինքն էլ հարկային մասնագետ չէ:
– Դուք՝ որպես սեփականատեր և քաղաքական գործիչ, նկատե՞լ եք, որ Հայաստանի գործարար ոլորտում հավասար դաշտ չի եղել:
– Իհարկե: Խոսենք այն մասին, որ Հայաստանում հավասար մրցակցություն ապահովող վարչարարություն, այդ թվում` նաև հարկային և ոչ միայն հարկային ոլորտում, դեռ վաղ է: Բայց խնդիրն այնքանով է կարևորվում, որ եթե այդ հարցերը լուծված լինեին, այսօրվա կառավարությունն այդ խնդրի առջև կանգնած չէր լինի: Դա հարցերի հարցն է, և այսօրվա կառավարությունը շատ լավ հասկանում է, որ առանց այդ խնդիրը լուծելու` երկիրը չի կարող զարգացում ունենալ: Եվ իհարկե, պետք է ողջունել, եթե այդպիսի ցանկություն կա:
– Հովիկ Աբրահամյանը նաև ասել է, որ պետք է սկսել մեզանից, իր շրջապատից, իրենից: Դուք հավատո՞ւմ եք, որ ինքը, ՀՀԿ-ի մի շարք խոշոր գործարարներ, նաև իր խնամի ԲՀԿ ղեկավար Գագիկ Ծառուկյանն իրենց բիզնեսը կբերեն հարկային հավասար դաշտ:
– Կարծում եմ` այո:
– Եվ որ Հ. Աբրահամյանի այդ հայտարարությամբ իշխանություններն ընդունում են, որ մինչ այժմ այդ ոլորտում հավասար դաշտ չի եղել:
– Իսկ եթե աղմկահարեին, որ Հայաստանում հավասար տնտեսական դաշտ է եղել, մենք կհավատայի՞նք, կամ դուք կհավատայի՞ք:
– Իսկ ինչո՞ւ չի եղել:
– Տարբեր պատճառներով: Նախ` առհասարակ բացարձակ հավասար տնտեսական դաշտ որևէ երկրում չկա: Առավել ևս` չկա այն երկրներում, որոնք նոր են անցնում նոր տնտեսվարման եղանակին, նոր հասարակական հարաբերություններին: Առավել ևս` այն երկրներում, որտեղ ձևավորված են ինչ-որ ադաթներ, ինչպիսին մեր երկիրն է: Առավել ևս` այն երկրներում, որտեղ դեռ ձևավորված չէ տնտեսական էլիտան, մտավորական էլիտան, մշակութային էլիտան: Պատճառներ շատ կան, ժամանակ է պահանջվում, որ մենք կարողանանք հասնել ամբողջական մրցակցության:
– Մեր ադաթներ ասելով՝ ի՞նչ նկատի ունեք:
– Խնամիաբարեկամական կապերը: Իհարկե, դա կա մեր երկրում, և պետք չէ աչքերը փակել և բացի սեփական անձից` բոլորին մեղադրել: Վստահ եմ, որ ես էլ, դուք էլ ունենք այդ ադաթին ենթարկվելու և հաշվի նստելու մշակույթը:
– Նախկին վարչապետ Տիգրան Սարգսյանին չհաջողվեց հավասար պայմաններ ստեղծել, ինչո՞ւ եք համոզված, որ Հ. Աբրահամյանին կհաջողվի:
– Հ. Աբրահամյանն ավելի պրակտիկ մարդ է, ավելի մեծ փորձ ունի հենց այն տիրույթում, որը պատրաստվում է կարգավորել: Տ. Սարգսյանն ավելի տեսական ոլորտի մարդ էր: Իհարկե, նա ևս քաջ գիտակցում էր, որ սա խնդիրների խնդիրն է, բայց լուծելու հնարավորություններ ավելի ունի Հ. Աբրահամյանը:
– Տ. Սարգսյանը հայտարարելուց զատ` նաև օրենսդրական նախաձեռնություններ էր ներկայացնում: Օրինակ` պարտադիր աուդիտի և թափանցիկ գործելու հետ կապված մի շարք նախաձեռնություններ, իսկ Հ. Աբրահամյանը հայտարարեց, բայց օրինագիծ ներկայացրեց ԱԺ խոշոր ձեռնարկությունների համար պարտադիր աուդիտը հանելու մասին:
– Ինչ է, այդ Պարտադիր աուդիտի մասին օրենքն այս կառավարությունը հանե՞լ է: Այդպես չէ, կարդացեք, կհասկանաք:
– Դուք կարդացել հասկացե՞լ եք:
– Ես էլ չեմ կարդացել:
– Խոշոր ձեռնարկությունների համար պարտադիր աուդիտի անցկացումը չեղյալ է համարվում:
– Այդպիսի բան չկա:
