«Կառավարության այս վիճահարույց որոշումն առաջացնում է բազմաթիվ հարցականներ: Առնվազն տարօրինակ է, երբ իրեն ազատական հռչակող տնտեսական թիմը պատրաստվում է կիրառել շուկայական տնտեսության տարրական սկզբունքներին հակասող քաղաքականություն»,- «Առաջին լրատվականի» հետ զրույցում այսօր ասաց ԱԺ ՀՅԴ խմբակցության պատգամավոր Արա Նռանյանը` անդրադառնալով կառավարության այն որոշմանը, ըստ որի` եթե 30 օրվա կտրվածքով 30 և ավելի տոկոսով որևէ ապրանքի գին աճում է, ապա կառավարությունն է սահմանում դրա գինը` մինչև 90 օրով:
«Ավելին, այս քաղաքականությունը շատ հեռու է և հակասում է տնտեսությունում պետական միջամտության և պետական աջակցության այն ռազմավարությունից, որի կրողն են ձախ քաղաքական ուժերը, այդ թվում` Հայ հեղափոխական դաշնակցությունը: Գոյություն ունեն գների վրա ազդելու կամ գնագոյացմանը միջամտելու բազմաթիվ այլ քաղաքակիրթ միջոցներ, քան առաջարկում է կառավարությունը:
Իսկ հարցերն այսօր շատ են: Ինչու 30 տոկոսանոց շեմ և ինչ է լինելու օրինակ 29 կամ թեկուզ 20 տոկոս գնաճի դեպքում: Չէ՞ որ ամսական 20 տոկոսը նույնպես խայտառակ գնաճ է:
Հաջորդ հարցադրումը վերաբերում է այն հարցին, թե ի՞նչ է տեղի ունենալու 90 օր հետո, երբ կառավարության` գները պարտադրելու ժամկետն անցնի: Արդյոք չի՞ նշանակում, որ տնտեսվարողը կարող է առանց մտահոգության բարձրացնել գները: Ի վերջո ամենամեծ խնդիրը կայանում է նրանում, որ կառավարությունը վարում է անկանխատեսելի քաղաքականություն և իր իսկ վտանագավոր գործողություններով կարող է վտանգել երկրի տնտեսությունը: Այս դեպքում մենք կունենանք ոչ թե բարձր գներով ապրանքներ, այլ ապրանքային դեֆիցիտ:
Եթե Հայաստանում որևէ ապրանքային շուկայում բացակայում են մրցակցային հարաբերություններ, ապա պետք է ոչ թե արհեստականորեն զսպել գները, այլ ապահովել մրցակցությունը: Իսկ եթե մրցակցությունն ապահոված է, քո միջամտությունը գներին պարզապես կնշանակի հարված հասցնել տնտեսվարողներին, որոնք, գործելով մրցակցային պայմաններում, պետք է վաճառեն ապրանքներ ավելի էժան, քան ի վիճակի են: Իսկ դա նշանակում է, որ տնտեսվարողն պարզապես կարող է հրաժարվել ինքնարժեքից ցածր վաճառելուց: Արդյունքում ընդհանրապես մենք կհիշենք վաղուց մոռացված բառը` դեֆիցիտը:
Գնային առաստաղի սկզբունքի կիրառումը, ինչը որոշ պայմաններում համարում եմ ընդունելի, կարող է գործադրվել միայն նախօրոք խաղի կանոնները սահմանելու դեպքում: Կառավարությունը հենց սկզբից պետք է հռչակի իր քաղաքականության մասին այս կամ այն ապրանքային շուկայում: Դրանից հետո տնտեսվարողն ինքը կորոշի մտնե՞լ այդ խնդրի մեջ, թե՞ ոչ: Այնինչ կառավարության այսօրվա ցանկությունը հետևյալն է. արտադրեք կամ ներկրեք ապրանքներ ինչպես ուզում եք, իսկ մենք հետո կորոշենք ինչպես եք այն վաճառելու:
Կարծում եմ, որ սա կառավարության կողմից վատ մշակված և չհիմնավորված հերթական քայլն է, որի նպատակն է հասարակությունում գնաճի դեմ պայքարելու պատրանք ստեղծել` հուսալով, որ այդ ահռելի գնաճը` 30 տոկոսի չափով, տեղի չի ունենա: Իսկ եթե հանկարծ տեղի ունեցավ, ապա դա լավագույն առիթն է սեփական սխալներն ուրիշների վրա բարդելու և որոշ տնտեսվարողներին «պատժելու» համար: Իսկ այդ գործելաոճը արդեն նեոլիբերալ-բոլշևիզմ է»,- նշեց ՀՅԴ-ական պատգամավորը:
