Թուրքական Cumhuriyet թերթի փոխանցմամբ, էներգետիկ ու բնական ռեսուրսների նախարար Թաներ Յըլդըզը հայտարարել է, որ ճապոնական ատոմակայաններում տեղի ունեցած աղետները Թուրքիային հետ չեն պահի միջուկային էներգիայից օգտվելուց.
«Ճապոնիայում տեղի ունեցած երկրաշարժը չի անդրադառնա երկու ատոմակայան ունենալու շուրջ մեր պլանների վրա: Ճապոնիայում տեղի ունեցած աղետից մենք պետք է կոնկրետ դասեր քաղենք և աշխատում ենք այդ ուղղությամբ:
Ճապոնական ատոմակայանը կառուցվել է 40 տարի առաջ, այսինքն` այն առաջին սերնդի ատոմակայան է, մինչդեռ մենք Թուրքիայում կառուցելու ենք երրորդ սերնդի ատոմակայան: Մեր ատոմակայանը պետք է պատրաստ լինի 8 բալ ուժգնությամբ երկրաշարժին: Մենք ռուսական կողմի հետ կբանակցենք անվտանգության չափորոշիչների բարձրացման շուրջ»:
Հիշեցնենք, որ ճապոնական երկրաշարժից ու ցունամիից հետո, երբ միջուկային պայթման վտանգ առաջացավ, թուրքական մի շարք բնապահպանական ու հասարակական կազմակերպություններ իշխանություններին կոչ արեցին զերծ մնալու միջերկրածովյան Մերսինի նահանգի Աքքույու վայրում ատոմակայան կառուցելուց, որը պետք է իրագործի ռուսական կողմը: Չպետք է մոռանալ, որ ժամանակին Աքքույուից 180 կիլոմետր հեռավորության վրա տեղի է ունեցել 6.2-բալանոց երկրաշարժ:
Մյուս ատոմակայանը կառուցվելու է սևծովյան Սինոպի շրջանում: Այս հարցում բանակցություններ են վարվում ճապոնական կողմի հետ:
Ատոմակայանների կառուցումը Թուրքիային կօգնի նվազեցնելու ներկրվող էներգակիրների (նավթի ու բնական գազի) հարցում ունեցած մեծ կախվածությունը: