Կոալիցիոն միասնական ցուցակին ԿԸՀ անդամ, ՀԱԿ ներկայացուցիչ Զոյա Թադևոսյանը լուրջ չի վերաբերվում. նրա բնորոշմամբ, այդ ամենը էական չէ մեր երկրում տիրող ներկայիս իրավիճակի համեմատ:
«Այսօր ցանկացած քննարկում` տնտեսական, սոցիալական, քաղաքական, այս ամենը ոչինչ են այն իրավիճակի համեմատությամբ, որում մենք այսօր գտնվում ենք: Մենք այսօր ազգովի պարտավոր ենք մեր երկիրը կործանումից դուրս բերել և չնայել, թե ով է կողքիդ` ՀՀԿ-ն, ԲՀԿ-ն, թե ՕԵԿ-ը»,- «Առաջին լրատվականի» հետ զրույցում կարծիք հայտնեց Թադևոսյանը:
Թադևոսյանի խոսքերով, կարևորը հասկանալն է, որ մենք կորցնում ենք մեր հայրենիքը և 10 տարի հետո էլ հայրենիք չենք ունենա. «Ինձ համար կարևոր չէ կոալիցիայի միասնական ցուցակը, ես չեմ գնալու այն ճանապարհով, որով իրենք են գնում, ինձ չի հետաքրքրում այդ հերթական ընտրությունը, ես հերթական չեմ ուզում, ինձ պետք է արտահերթ, հնարավորինս շուտ փրկել մեր երկիրը»:
Զոյա Թադևոսյանը նշեց, որ արտահերթ ընտրությունները հավանական են այնքանով, որքանով մենք բոլորս լինենք վճռական. «Որ մենք վճռական ենք, դրանում կասկած չկա, մենք մարտի 17-ին ցույց ենք տալու, որ վճռական ենք»: