«Միկա»-ն մրցակցի հարկի տակ ոչ-ոքի խաղաց «Իմպուլս»-ի հետ և դուրս եկավ Հայաստանի գավաթի կիսաեզրափակիչ: Հանդիպումն ավարտվեց 2:2 հաշվով: Առաջին խաղակեսից հետո «Միկա»-ն` Աղվան Մկրտչյանի և Նարեկ Բեգլարյանի գոլերի շնորհիվ հաղթում էր 0:2 հաշվով:
Երկրորդ խաղակեսում Արմեն Շահգելդյանը հանգստանալու հնարավորություն տվեց իր առաջատար ֆուտբոլիստներին, իսկ դիլիջանյան ակումբին հաջողվեց ոչ միայն հեղինակության գոլը խփել, այլև Արմեն Գյուլբուդաղյանցի սաները կարողացան հավասարեցնել հաշիվը. գոլերի հեղինակներ դարձան Արտակ Հովհաննիսյանն ու Էդուարդ Կակոսյանը:
«Միկա»-ն առաջին խաղում տոնած խոշոր` 3:0 հաշվով հաղթանակի շնորհիվ դուրս եկավ կիսաեզրափակիչ, որտեղ կհանդիպի «Բանանց»-ին:
Հիշեցնենք, որ կիսաեզրափակիչ են դուրս եկել նաև «Փյունիկ»-ին պարտության մատնած «Շիրակ»-ն ու «Ուլիս»-ը, որը քառորդ եզրափակիչում հաղթեց «Արարատ»-ին: