Թուրքական Anadolu գործակալության փոխանցմամբ, Իսրայելը Միջերկրական ծովում` իր ափից մոտ 200 մղոն հեռավորության վրա, բռնազավթել է Թուրքիայի Մերսին նավահանգստից դեպի Եգիպտոս ուղևորվող Victoria նավը և այն փոխադրել սեփական նավահանգիստներից մեկը: Նավի անձնակազմը չի դիմադրել:
Իսրայելական բանակի մամլո ծառայությունը հայտարարել է, որ նավի վրա հայտնաբերվել են տարատեսակ զենքեր, ինչը նախատեսված է եղել Գազայի հատվածում գործող ահաբեկչական կազմակերպությունների համար:
Միևնույն ժամանակ, նշվել է, որ Թուրքիան որևէ կապ չունի այս ամենի հետ, քանի որ ֆրանսիական ընկերության արտադրած այդ նավը լողարկել է Լիբերիայի դրոշով և պատկանել է գերմանական մի ընկերության:
Հիշեցնենք, որ այն բանից հետո, երբ 2007 թվականի ամռանը Գազայի հատվածը հայտնվեց իսլամական Համաս կազմակերպության վերահսկողության ներքո, Իսրայելը ծովային շրջափակման ենթարկեց Գազայի հատվածը, ինչն անցյալ տարվա մայիսի 31-ին սեփական կաշվի վրա զգաց Թուրքիան:
