Ռուսաստանի արտաքին գործերի նախարար Սերգեյ Լավրովը հարցազրույց տալով ճապոնական NHK հեռուստաընկերությանը, կրկին նշեց, որ երկրի ղեկավարի այցելությունը Կուրիլներ Ռուսաստանի ներքին խնդիրն է, և այդ հարցով իրենք չեն պատրաստվում որևէ մեկի հետ խորհրդակցել:
«Ռուսական կողմը չի պատրաստվում որևէ մեկի խորհուրդներին հետևել այն հարցում, թե ուր պետք է գնա Ռուսաստանի նախագահը սեփական տարածքում»,- նշել է Լավրովը:
Հիշեցնենք, որ մի քանի ամիս առաջ Ռուսաստանի նախագահ Դմիտրի Մեդվեդևն այցելել էր Ռուսաստանի և Ճապոնիայի համար վիճելի տարածքներ համարվող Կուրիլյան կղզիներ, որից հետո երկու երկրների միջև ծայրաստիճան սրվել էին հարաբերությունները: Շատերը կարծում էին, որ ողբերգությունը, որ տեղի ունեցավ Ճապոնիայում, և դրան հետևած ռուսական օգնությունը կարող էին որոշակի առումով բարելավել երկկողմ հարաբերությունները:
Սակայն Լավրովի հայտարարությունները, ինչպես նաև դրան նախորդած Մոսկվայում Ճապոնիայի դեսպանի խոսքերն առ այն, որ չնայած աղետին, երկկողմ հարաբերություններից դուրս չի եկել տարածքային խնդիրը, միայն բարդացնում են իրավիճակը: