Կոտայքի մարզի առաջին ատյանի ընդհանուր իրավասության դատարանում դերասան Վարդան Պետրոսյանի մասնակցությամբ Եղվարդ-Երևան ճանապարհին հոկտեմբերի 20-ին տեղի ունեցած վթարի գործով դատական հերթական նիստի ընդմիջումից հետո Վարդան Պետրոսյանի պաշտպան Նիկոլայ Բաղդասարյանը նշեց, որ հետ է վերցնում թարգմանչին փոխելու միջնորդությունը, քանի որ կիրակի օրը պաշտպանը մեկնելուէ Ֆրանսիա, և նրա միջնորդությունը այդպես էլ չի հասցնի ներկայացնել:
Ֆրանսիայից ժամանած պաշտպան Մարի Լոր Դոզեն նշեց, որ այստեղ է՝ Վարդան Պետրոսյանին պաշտպանելու համար: Նրա խոսքով՝ Վարդան Պետրոսյանն այն անձը չէ, ով կալանքի չվերցնելու պարագայում դիմի փախուստի:
«Արդեն տարիներ շարունակ նա հայ ժողովրդի հետ է, նա չի փախչի իր երկրից, նա իր երկրի, իր ժողովրդի հետ է տարիներ շարունակ: Ոչ մի հանգամանք չկա, որ նա ազատության մեջ լինելու դեպքում կդիմի փախուստի: Սա ոչ իր կամքով հանցանք է՝ տեղի է ունեցել ճանապարհային երթևեկության խախտում»,- ասաց նա:
Եվ քանի որ դատական դեպարտամենտի տրամադրած թարգմանիչը անընդհատ հարցեր էր տալիս նրան թարգմանության ընթացքում, ֆրանսիացի պաշտպանը ընդդիմացավ, նշեց, որ չի կարող շարունակել իր միջնորդությունն այն դեպքում, երբ իրեն անընդհատ հարցեր են տալիս, և չցանկացավ միջնորդությունը շարունակել:
Դատավորը նշեց, որ թարգմանիչը ակնհայտորեն դժվարություններ ունի և դատարանի նախաձեռնությամբ գործի քննությունը հետաձգեց: Հաջորդ նիստը նշանակվեց մայիսի 20-ին՝ առավոտյան ժամը 10:30-ին:
Միևնույն ժամանակ դատավորը նշեց, որ ՀՀ դատական դեպարտամենտին բանավոր և գրավոր ֆրանսերեն թարգմանություններ անելու համար ևս մեկ թարգմանչի ներգրավելու միջնորդություն կներկայացնի:
Վարդան Պետրոսյանի պաշտպան Նիկոլայ Բաղդասարյանը դատական նիստից հետո նշեց, որ դատարանի ցանկացած որոշում դուրս է դատավարական նորմից: Նա նշեց, որ իր մոտ այնպիսի տպավորություն է, թե տուժող կողմը նախապես գիտի՝ դատարանն ինչ որոշում է կայացնում:
«Չէր կարող դատարանը նման որոշում բավարարել, քանի որ մեղադրանքի մեջ չկա այն, որ անձը մեղադրվում է խմածության համար: Դա կտրուկ կմերժվեր, և այս ամենը լուրջ կասկածների տեղիք է տալիս»,- ասաց Նիկոլայ Բաղդասարյանը:
Նա նաև նշեց, որ ֆրանսիացի փաստաբանի միջնորդությունը վերաբերում է կալանքը որպես խափանման միջոց փոխելուն: