Գեղարքունիքի մարզի Դարանակ համայնքի ղեկավարի և ավագանու անդամների՝ մարտի 6-ին կայացած ընտրությունները ճանաչվել են անվավեր՝ հաշվի առնելով այն հանգամանքը, որ քվեարկության օրը 12:00-ին քվեարկությունն ավարտվել է քվեաթերթիկների սպառման պատճառով:
ԿԸՀ նախագահ Գարեգին Ազարյանը այսօրվա նիստում նշեց, որ քվեարկությունից երկու օր առաջ համայնքի ընտրողների թիվը 59-ով ավելանալու վերաբերյալ իրենք պարզաբանումներ են իրականացնում:
Ազարյանի խոսքերով, 59-ից 21-ի հանգամանքները պարզվել են, և հստակ է, որ այդ 21-ից 16-ը Դարանակի ընտրություններից երկու շաբաթ առաջ գրանցված են եղել Գեղարքունիքի մարզի մեկ այլ համայնքում: Ավելին` Դարանակի քվեարկությանը մասնակցել է նաև մի մարդ, որը մեկ շաբաթ առաջ ընտրվել է Այգուտի ավագանու անդամ:
Նշենք, որ ԿԸՀ նիստին հանձնաժողովի 8 անդամներից ներկա էին 7-ը: Նիստին չէր մասնակցում «Բարգավաճ Հայաստան» կուսակցության ներկայացուցիչը:
ԿԸՀ կայացրած որոշմանը ձեռնպահ քվեարկեցին ԿԸՀ-ում դատական դեպարտամենտի երկու անդամները՝ Էդգար Սեդրակյանը և Կարեն Փոլադյանը:
Գարեգին Ազարյանը զարմացավ իր գործընկերների նման պահվածքից և այդ մասին բարձրաձայնեց՝ նշելով. «Ինձ համար շատ անհասկանալի է դատական ծառայողների սույն քվեարկությունը, որովհետև, եթե ունեիք այլ առաջարկություն, կարող էիք նաև հարց տալ կամ հիմնավորել»:
