Քիչ առաջ ավարտվել է ՀԺԿ 8-րդ համագումարը, որի ընթացքում ընտրվել է վարչության ընդլայնված նիստով 12 հոգուց բաղկացած քաղաքական խորհուրդ: Խորհուրդն ունի երկու նոր անդամներ: Կուսակցության նախագահ է վերընտրվել Ստեփան Դեմիրճյանը:
Ինչպես հայտնի է՝ ՀԺԿ-ն որոշել է համագումարն անցկացնել սեփական գրասենյակում: «Առաջին լրատվական»-ի հարցին՝ ինչո՞ւ է նման որոշում կայացվել, Ստեփան Դեմիրճյանն ասաց. «Որովհետև էստեղ շատ հարմար է: Մենք մեծ դահլիճ ունենք: 150 պատվիրակ է մասնակցել, 80 հոգի ընտրվել է վարչության անդամ: Վարչության ընդլայնված նիստով էլ ընտրվել է քաղաքական խորհուրդը»:
Վարչության քարտուղարներ են ընտրվել Գրիգոր Հարությունյանը, Ֆելիքս Խաչատրյանը և Ստեփան Մինասյանը:
ՀԺԿ 8-րդ համագումարը որևէ փոփոխություն կուսակցության դիրքորոշման մեջ չի մտցրել, սակայն ՀԺԿ-ն դեմ է շրջանառության մեջ դրված սահմանադրական փոփոխությունների փաթեթին:
«Կուսակցության դիրքորոշումը շատ հստակ է. Կուսակցությունը գտնում է, որ առաջնահերթ խնդիրը մեր երկրում ժողովրդավարական գործընթացների միջոցով օրինական իշխանության ձևավորումն է: Սա է հստակ դիրքորոշումը: Կուսակցությունը դա է առաջնահերթ խնդիր համարում, ոչ թե սահմանադրական բարեփոխումների իրականացումը: Նաև համարում է, որ միայն օրինական իշխանությունը կարող է սահմանադրական փոփոխություններ իրականացնել, և երկրում առկա վիճակը ոչ թե պայմանավորված է Սահմանադրության անկատարությամբ, այլ Սահմանադրության ոտնահարմամբ: Եվ ՀԺԿ-ն առաջին հերթին գտնում է, որ պետք է իրացվի Սահմանադրության երկրորդ անփոփոխ հոդվածը, համաձայն որի՝ ժողովուրդն իր իշխանությունն իրականացնում է ազատ ընտրությունների միջոցով»,-մեզ հետ զրույցում ասաց Ստեփան Դեմիրճյանը:
Մեր հարցադրմանը՝ ՀԺԿ-ն շարունակելո՞ւ է համագործակցել ՀԱԿ-ի հետ, Ստեփան Դեմիրճյանն ասաց. «ՀԺԿ-ն շարունակելու է համագործակցել թե ՀԱԿ-ի հետ, թե ընդդիմադիր մյուս ուժերի հետ: Մենք համարում ենք, որ երկրին անհրաժեշտ են համակարգային արմատական փոփոխություններ և պետք է սկսել օրինական իշխանություն ձևավորել: Այդ նպատակով պատրաստ ենք համագործակցել տարբեր ուժերի հետ»:
Մեր հաջորդ հարցին՝ ՀԺԿ-ն ինչպե՞ս է վերաբերվում խորհրդարանական ընդդիմադիր քառյակի գործունեությանը, Ստեփան Դեմիրճյանն ասաց. «Ես ինքս չեմ մասնակցում հանդիպումներին: Պառլամենտական համագործակցություն է, ինչպես տեսնում ենք, ահագին հարցերի շուրջ: Հարցեր կան, որոնց շուրջ գալիս ենք ընդհանուր հայտարարի»:
Լուսանկարը` PanARMENIAN Photo-ի