Խորհրդային միության պետական և քաղաքական գործիչ, բոլշևիկ Անաստաս Միկյանի արձանը, չնայած բազմաթիվ դժգոհություններին, այդուհանդերձ տեղադրվելու է:
Նույնիսկ Հայաստանում Լեհաստանի դեսպան Զդիսլավ Ռաչինսկին Միկոյանի արձանը Երևանում կանգնեցնելու գաղափարը անհասկանալի և անբարոյական է համարում։ Հայաստանի Մարքսիստական կուսակցության նախագահ Դավիթ Հակոբյանը, սակայն, «Առաջին լրատվական»-ի հետ զրույցում, ի հեճուկս քննադատությունների, հայտարարեց, որ պետք է տեղադրել ոչ միայն Անաստաս Միկոյանի, այլև նրա եղբոր՝ ավիակոնստրուկտոր, գեներալ-գնդապետ Արտեմ Միկոյանի արձանը:
«Ընդհանրապես ասեմ. Լեհաստանի դեսպանը թող Հայաստանի Հանրապետության ներքին գործերի մեջ քիթը չխոթի: Դա առաջին հերթին դիվանագիտական կանոնակարգի խախտում է, և նրանով չէ, որ Հայաստանի Հանրապետությունը պետք է որոշի՝ ինչ անել: Հատկապես Արևմուտքի, ՆԱՏՕ-ի և Եվրամիության որևէ պետություն իրավունք չունի իր կարծիքը հայտնել. թող նրանք իրենց երկրների մասին մտածեն, այստեղ թող կարգադրություններ չանեն: Մենք նրանց չենք վստահում»,- ասաց Հայաստանի գլխավոր մարքսիստը:
Դիտարկմանը ի պատասխան՝ իսկ Հայաստանում Ռուսաստանի դեսպան Իվան Վոլինիկինը իրավունք ունի՞ «քիթը մտցնել» Հայաստանի ներքին հարցերի մեջ և հայտարարել, որ պետք է չեզոքացվեն այն բոլոր հասարակական կազմակերպությունները, որոնք հայ-ռուսական հարաբերություններում սեպ են խրում, Դավիթ Հակոբյանն ասաց․ «Ոչ, չեզոքացնել բառը նա իրավունք չուներ օգտագործել, դիպլոմատիկ սխալ, վրիպում է: Նա այդ բառն իրավունք չուներ օգտագործել, ավելի քաղաքակիրթ և դիվանագիտական բառ կարող էր ընտրել. ձևակերպումներ կան»:
Մենք հետաքրքվեցինք, թե Դավիթ Հակոբյանն ի վերջո կո՞ղմ է, որ Երևանում տեղադրվի բոլշևիկ Անաստաս Միկոյանի արձանը: «Ես կարծում եմ, որ քաղաքական ու հասարակական այն մտածողների թևը, որ չափից ավելի նեգատիվային ձևով է ուզում ներկայացնել Անաստաս Միկոյանի քաղաքական կերպարը, չարաչար սխալվում և չափից ավել ուռճացնում է: Ես կոնկրետ նպատակահարմար կգտնեի երկու եղբայրների՝ Անաստաս և Արտեմ Միկոյանների արձանները միասին տեղադրել: Բացի դրանից՝ 37-ականների ռեպրեսիաներին նրա մասնակցությունը և հանցավոր ռեպրեսիաների ցուցակում նրա անունը չկա՝ անգամ ռուսական ԿԳԲ-ի արխիվներում չկա: Տարոն Մարգարյանն ու ավագանին ճիշտ են մտածել, բայց պետք է երկու եղբայրների արձանը տեղադրել՝ առանձին ոչ»,- ասաց նա:
