«Առաջին լրատվական»-ն արդեն տեղեկացրել էր, որ «Կուբան»-ի նախկին ֆուտբոլիստ Նիկոլա Նիկեժիչին բռնի ուժով են ստիպել խզել ռուսական ակումբի հետ ունեցած պայմանագիրը, և չեռնոգորիացի ֆուտբոլիստը նամակով դիմել էր ՖԻՖԱ-ի ու ՈւԵՖԱ-ի ղեկավարներին, որ վերջիններն անպատիժ չթողնեն մեղավորներին: Այս պատմությունը մեծ հնչեղություն է ստացել ողջ ֆուտբոլային աշխարհում:
Ֆուտբոլիստների և մարզիչների արհմիություններն այդ կապակցությամբ հայտարարություն են տարածել, որում ասվում է, որ սա առաջին նմանօրինակ դեպքը չէ «Կուբան»-ում, և առաջիկայում կանդրադառնան նաև մյուս դեպքերին:
Ռուսաստանի ֆուտբոլի միության նախագահ Նիկոլայ Ֆուրսենկոն sovsport-ին տված հարցազրույցում նշել է, որ այս ամենը շատ տարօրինակ է: «Գործն ավելի քան տարօրինակ է: Ճանաչելով «Կուբան»-ի ղեկավարությանը՝ կասկածում եմ, որ նրանք կարող էին նման մեթոդներ կիրառել: Այդուհանդերձ, մենք պարտավոր ենք ստուգումներ անցկացնել: Մենք կդիմենք օրինապահ մարմիններին, որոնք կտան իրենց գնահատականը, իսկ ֆուտբոլի միության էթիկայի կոմիտեն արդեն զբաղվում է այդ գործով: Մանրամասների ի հայտ գալու դեպքում մենք պաշտոնական հաղորդագրություն կտարածենք»:
Սպասվում է, որ այսօր կայանալիք մամուլի ասուլիսի ժամանակ «Կուբան»-ի ղեկավարությունը, թիմի գլխավոր տնօրեն Սուրեն Մկրտչյանի գլխավորությամբ, կարտահայտի իր դիրքորոշումը:
