ՀՀ ԱԳ առաջին նախարար, «Ժառանգություն» կուսակցության վարչության նախագահ Րաֆֆի Հովհաննիսյանը հացադուլ է հայտարարել: Այդ մասին նա տեղեկացրեց «Ժառանգություն» կուսակցության համաժողովի ժամանակ: Նա ասաց, որ այս ակցիան թող կոչվի «Ձոն ազատության»:
Րաֆֆի Հովհաննիսյանն ասաց, որ առանձնանում է իր ընտանիքի հետ և առաջիկայում կրկին կհանդիպի: Թե քանի օր է տևելու նրա հացադուլը՝ պարոն Հովհաննիսյանը չասաց, իսկ լրագրողների հարցերին խոստացավ պատասխանել մի քանի օր հետո`ասելով, որ իր ելույթում ամեն ինչ ասել է:
Րաֆֆի Հովհաննիսյանի որոշումը անակնկալ էր «Ժառանգություն» խմբակցության համար: ԱԺ «Ժառանգություն» խմբակցության ղեկավար Ստեփան Սաֆարյանը մեզ հետ զրույցում նշեց, որ իրենք պետք է հավաքվեն կուսակցությունում՝ քննարկելու այս իրավիճակը:
Ի դեպ, Րաֆֆի Հովհաննիսյանը ներկայացել էր սափրված և իր ելույթում ասաց, թե իր նոր իմիջը Հայաստանի՝ նոր փոփոխությունների գնալու սկիզբը կլինի:
